Өнөөдөр аравдугаар сарын 12. Хүйтэн дайны үед НҮБ-ын ерөнхий Ассамблей хуралдаж байх үед энэ өдөр нэгэн итгэмээргүй явдал болсон юм. Тэр үеийн ЗХУ-ын удирдагч Никита Хрушев 1960 оны энэ өдөр НҮБ-ын ерөнхий ассамблейн хурал дээр гутлаа тайлж, ширээ нүдэн “сүрдүүлсэн” гэдэг. Тэр үед коммунизмын заналт дайсан шахуу болоод байсан Филиппиний төлөөлөгчдийн тэргүүн Лоренцо Смулон НҮБ-ын танхимд үг хэлэхэд тэрээр эгдүүцэж эхэлсэн гэнэ. Тэрбээр төлөөлөгчдийн анхаарлыг татаж бугуйн цагаа тайлж гартаа өнхрүүлж бусад улсын тэргүүнүүд үг хэлэх үед бухимдан цагаараа, эцэст нь гутлаа тайлж ширээ нүдэж эсэргүүцлээ илэрхийлж байлаа. Хүмүүс шуугилдаж эсэргүүцэхэд хурал даргалагч танхимыг чимээгүй болгох гэж алхаа хэт чанга нүдсэнээс хугалж орхижээ. Энэ нь тэр үед дэлхийн хамгийн хүчирхэг гүрнийг гартаа атгасан удирдагчийн хэнэггүй, дээрэнгүй, үйлдэл болж түүхэнд тэмдэглэгдэн үлдсэн юм. Гэхдээ түүнийг яг ч гутлаараа ширээ нүдээгүй гэх. Хрушевын ач охин, өдгөө Америкт амьдардаг доктор Нина Хрушева “Филадельфи Инкуайер” сонины сурвалжлагчид өгсөн ярилцлагадаа "Үнэн хэрэгтээ өвөө маань багадсан гуталтай НҮБ-ын хуралд оржээ. Гутал нь бариад байхаар нь өнөөх л хэнэггүй зангаараа өрөөснийг нь тайлаад тавьчихаж. Гэтэл Филиппиний төлөөлөгчид үг хэлж эхлэхэд өвөө маань эгдүүцэж ширээгээ гараараа нүдсэн байна. Энэ үед бугуйн цаг нь мултрахад авахаар тонгойгоод өндийхдөө гуталтай гараараа ширээгээ тулахыг их олон хүн харж гутлаараа нүдэж байж гэж ойлгосон бололтой байдаг" хэмээжээ.   Н.Өрнө