- Нэг клип дор хаяж ямар үнээр бүтдэг вэ. Хамгийн үнэтэй клипээ ямар өртгөөр хийлгэж байв ? - Америкт бол дор хаяж 100 мянган ам.доллар. Сонирхогчийн хэмжээнд хийлгэж болно. MTV-гээр цацагддаг шиг клипүүд хийлгэе гэвэл 100 мянган ам.доллараас дээш үнээр хийлгэдэг. Бид Америкт клип хийлгээгүй. Энд ирээд л нэлээд хэдэн клип хийлгэлээ. Хамгийн үнэтэй клип 10 гаруй мянган ам.доллараар бүтсэн.

- Та нар сайн байна. Эзэмшсэн мэргэжил чадвараараа энэ зэрэгтэй яваад чинь баяр хүргэе. Та хэд нэг гэр бүл, ах дүү шиг болсон болов уу гэмээр харагдаж байна. Эмоушны бүсгүйчүүд хэд хүртлээ хамтлагаараа дуулж уран бүтээлээ хийх вэ? - Бид нарын мөрөөдөл бүүр багаасаа эхэлсэн. Анх эхлэхдээ л “Үргэлж хамтдаа” гэдэг байсан. Анх 14-15 настай охидууд хамтран дуулж эхэлсэн. Тэр үеэс л үргэлж найзууд байна гэж бодож байсан, одоо ч тэр хэвээрээ л байна. Хэзээ дуулахаа болихыг цаг хугацаа харуулах байх гэж бодож байна. Энэ талаар одоохондоо бодсон зүйл алга. - Sweetymotion өмнөх байр сууриа эргүүлэн авч чадсан уу? - Бид эргэж ирээд анх ямар байснаа эргэж сануулсан тайлангаа хийсэн. Тоглолтоороо өөрсдийн  орон зайгаа баталж өгсөн болов уу. Одоо ч гэсэн орон зайгаа батлахын төлөө уран бүтээлээ хийж байна. Биднийг эргэн ирэхэд тухайн үед биднийг сонсож байсан хүмүүсээс гадна шинэ үеийнхэн гарч ирсэн байсан. Энэ нь нэг талаас биднийг илүү хөдөлмөрлөх болоод илүү өөрөөр ажиллах шаардлагыг бий болгосон гэж хэлж болно. - Найзууд гэхээр зайлшгүй Солонгын тухай асуух ёстой болоод байна. Хамтарч уран бүтээл хийх боломж хэзээ гарах бол? - Хамтарч шинэ уран бүтээл хийхээр яригдаагүй байгаа. Ирээдүйд ямар боломж гарахыг хэлж мэдэхгүй. Бид Америк руу гэрээний дагуу явж тоглолтоо хийдэг. Солонгоо маань энд мөн л өөрийн уран бүтээлээ хийж байна. Тодорхой бизнес эрхэлж байна. Тэр утгаараа бид яг хамтраад уран бүтээл хийх боломж хэзээ, хэрхэн  гарахыг хэлж мэдэхгүй байна.