Засгийн газрын хуралдаанаар Бурхан багшийн эрдэнийн шүтээнийг хосгүй үнэт дурсгалт зүйлийн жагсаалтад оруулахаар шийдлээ. Мөн Засгийн газраас ажлын хэсэг байгуулах шийдвэр гаргалаа. Бурхан багшийн цахиур эрдэнэ буюу шүдийг Монголд 436 жилийн өмнө залж авчран шүтэж, цагийн эрхээр нууцлан тахиж, улмаар бүр ч чандлан хадгалж байсан нь олджээ. Арвандөрөвдүгээр Далай лам Данзанжамц өнгөрсөн оны арваннэгдүгээр сард Монголд ирэхдээ энэхүү нандин шүтээнд сүжиг бишрэлтэйгээр мөргөн залбирсан юм. “Пост коммунист орнуудын шашны байдал” олон улсын хурал Улаанбаатарт өнгөрсөн оны долдугаар сард болоход ирж оролцсон Ажа ренбүүчи Бурхан багшийн шүд мөн хэмээн анхлан залбирч мөргөсөн тухай манай сайт өмнө нь мэдээлсэн билээ.