Говь-Алтай аймгийн Цээл сумын Засаг дарга Ц.Батбаяр, тус сумын Засаг даргын тамгын газрын төрийн сангийн төлөөлөгч И.Дармаа нар албан тушаалын байдлаа ашиглан давтан үйлдлээр “Алтай Дэвшил” хоршооны захирал Б.Наранцэцэгтэй бүлэглэн уг хоршооны дансад улсын төсвийн хөрөнгөөс 32,750,000 төгрөгийг шилжүүлж улсад онц их хэмжээний хохирол учруулсан гэмт хэрэг үйлджээ.  Уг хэргийг орон нутагт шалгаж Ц.Батбаярт Эрүүгийн хуулийн 272 дугаар зүйл 272.2 дахь хэсэгт зааснаар албан тушаал явуулах үйл ажиллагаа явуулах эрхийг нь хасахгүйгээр 1 жил 6 сарын хорих ял оногдуулж, оногдуулсан ялыг Эрүүгийн хуулийн 61 дүгээр зүйл 61.1 дэх хэсэгт зааснаар 1 жилийн хугацаагаар тэнсэж, шүүгдэгч И.Дармаад холбогдох Эрүүгийн хуулийн 150 дугаар зүйл 150,3 дахь хэсэгт заасан зүйл хэсгийг хэрэгсэхгүй болгож,263 дугаар зүйл 263.2 дахь хэсэгт зааснаар албан тушаал эрхлэх үйл ажиллагаа явуулах эрхийг 2 жилийн хугацаагаар хасч, 3 жил хорих ял оногдуулан, оногдуулсан ялыг Эрүүгийн хуулийн 61 дүгээр зүйл 61.1 дэх хэсэгт зааснаар 2 жил тэнсэж, шүүгдэгч Б.Наранцэцэгт холбогдох Эрүүгийн хуулийн 150 дугаар зүйл 150,3 дахь хэсэгт заасан зүйл хэсгийг хэрэгсэхгүй болгож тус тус шийдвэрлэсэн байна.  Харин уг хэрэгт хяналт тавьсан улсын яллагч шүүгдэгч нарт оногдуулсан ял хөнгөдсөн гэж үзэн эсэргүүцэл бичихээр шийдвэрлэжээ. Н.Түвшин