Төв аймгийн Лүн сум руу согтуугаар автомашин жолоодож явсан “Дөлгөөн нуур” ХХК-ийн захирал Ч.Батсүх  осол гаргаж зургаан хүн гэмтээсэн хэрэгт холбогджээ.  Хэргийн талаар тодруулбал сар шинийн нэгний өдөр Ч.Батсүх  Hаmmer  маркийн 00-63 УБМ автомашинаараа  Honda Fit  маркийн 06-90 УНМ маркийн автомашинтай мөргөлдөж улмаар автомашинд зорчиж явсан 1-10 насны хоёр хүүхэд, дөрвөн  том хүн  хүнд  зэргийн гэмтэл авч ГССҮТ-д хүргэгдсэн байна. Гэмтэл авсан зорчигчдоос нэг настай хүүхдийн хөл хугарч гэмтсэн бол  10 настай охины эрүү хугарч нүдний ухархайн яс нь цуурч, үүдэн шүднүүд нь  цөмөрсөн, баруун талын хоёр хавирга хугаралтай, түнх мултралтай ГССҮТ-д хүргэгдэн иржээ. Зарим эх сурвалжийн яриагаар Honda Fit  маркийн машины зорчигчид Төв аймгийн Лүн сумаас Эрдэнэ-Сант сум руу золголт хийхээр явж байсан юм байна. Харин “Дөлгөөн нуур” ХХК-ийн захирал Ч.Батсүх нь Улаанбаатар хотоос согтуугаар тээврийн хэрэгслээ жолоодон Лүн сум руу явж байгаад уг ослыг гаргажээ. Хохирогчдын ар гэрийхний өгч буй мэдээллээр осол  гарах болсон шалтгааныг “Ч.Батсүх  захирал замын хөдөлгөөний дүрэм зөрчин согтуугаар урсгал сөрж  автомашин жолоодон орж ирсэн” гэж үзэж байгаа аж. Гэвч цагдаагийн байгууллагаас ослын шалтгааныг урьдчилсан байдлаар тогтоохдоо Honda Fit  маркийн 06-90 УНМ маркийн машины жолооч Ж-ыг бас буруутай гэсэн дүгнэлт гаргасан байна. Ийм бодит байдлаас зөрүүтэй дүгнэлт гарсныг хохирогчид Ч.Батсүх захирлыг  томоохон компанийн захирал учраас цагдаагийн ажилтнуудад нөлөөлсөн байж болзошгүй гэж хардаж байгаа юм байна. Одоогийн байдлаар осол гаргаж зургаан хүнийг хүнд  гэмтээсэн эрхэм захирал  хохирогчидтойгоо уулзалгүй гадаад руу эмчилгээнд явсан гэх мэдээлэл байна. Уг нь  эрүүгийн байцаан шийтгэх хуульд зааснаар гэмт хэрэгт холбогдсон  сэжигтэнд шаардлагатай бол таслан сэргийлэх арга хэмжээ авч хилээр гадаад руу зорчихыг хориглосон байдаг. Тэгтэл энэхүү  хууль хөрөнгө мөнгөтэй томоохон компанийн компанийн захиралд үйчилдэггүй бололтой. Харин осолд өртсөн хүүхдүүдийн биеийн байдал хүндэвтэр байна. Н.Түвшин