Сар бүрийн эхний долоо хоногийн пүрэв гарагт болдог АН-ын “4:11” уулзалт Төрийн ордонд боллоо. Хуралдаанд УИХ дахь АН-ын бүлгийн дэд дарга Л.Гантөмөр, тус намын дарга Н.Алтанхуяг, Ерөнхий нарийн бичгийн дарга Д.Эрдэнэбат нар оролцлоо. АН-ын намын дарга Н.Алтанхуяг “Луу жил гарч манай нам ажилдаа орлоо. Эдийн засгийн хувьсгал эхэллээ цуврал лекцээ хийлээ. Цуврал лекц үргэлжлэн аймгийн төвүүдэд явагдана. Ер нь Улаанбаатар, Эрдэнэт, Дархан хотуудад төвлөрөх бус аймгийн төвүүдийг шинэ төлөвлөлт хийж, иргэд тавтай амьдрах боломж нээхээр бид хөдөө орон нутагт ажиллана, ярина. Түүнчлэн “Монгол хүн-2020” хөтөлбөрийн хүрээнд бүтээлээ ирүүлсэн эрдэмтэн, судлаачдыг шагнаж урамшууллаа. Өөрийнхөө салбарын чиглэлээр юуг яаж, өөрчлөх хэрэгтэй вэ гэдгийг сайн мэддэг учраас бид тэдний үгийг сонслоо” гэсэн юм. Мөн засгийн газартай холбоотой асуудлаар мэдээлэл хийлээ. Тэрбээр “Зургаан хувийн хүүтэй байрны зээлийн асуудлаар санал бодлоо илэрхийлмээр байна,  хамтарсан Засгийн газраас АН гараад 40 хонож байна. Хамтраад хийсэн сайн юмнаас манай намын нэр хасагдсан, муухан ажилд нь АН-ын буруу юм шиг ташаа ойлголт байна. Зургаан хувийн хүүтэй зээл нь хамтарсан Засгийн газрын үед дөрөвдүгээр сарын 27-ны өдөр батлагдаж гарсан тогтоолд байгаа. Гаргасан шийдвэрээр сайд нарын түвшинд журам гаргаснаа хэлэлцэж байгаа хэлбэр гэж ойлгосон. Журам гаргахдаа зөрчил гаргасан байна лээ. Засгийн газарт 50 метр кв хүртэл талбайтай байр гэж байсныг 55 метр кв болгосон байна. Хамтарсан засаг иргэний болоод эд хөрөнгийн бүртгэлийг хийж чадсан. Ирэх долоо хоногоос хэвлэл мэдээллийнхнийг Улсын бүртгэлийг үйл ажиллагаатай танилцуулж бодол байна. Мөн өчигдөр хийсэн цахим үнэмлэхийн мэдээлэлтэй холбогдуулан  манай намыг засгаас гарснаас болоод эсвэл Н.Алтанхуяг гэдэг хүн энэ ажлыг хариуцаж байгаад хаяж явсанаас болоод иргэний цахим үнэмлэх саатсан мэтээр ярьсан нь санаатай ажил. Бид Ц.Нямдорж сайдыг агентлагийн хүмүүстэй ирүүлж манай бүлэг дээр ярьсан. Энэ ажлыг авсан хүмүүс энэ ажил бүтэхгүй гэсэн байдлаар Ерөнхий сайд, Ерөнхийлөгчид бичиг хүргүүлснийг үзүүлсэн. Үүрэг гүйцэтгэж байсан хүнийг нь Ц.Нямдорж сайд халж хаяад МАН-ын нарийн бичгийн даргаар ажиллаж байсан хүнийг даргаар томилсон нь цаанаасаа энэ ажлыг бодлоготой, зорилготой, будлиантуулах, долдугаар сарын 1-ний хэргийг дахиж санагалзсан үйлдэл боллоо гэж манай намын бүлэг үзсэн” гэв. С.Жигүүр