Цагдаагийн ерөнхий газрын даргын үүрэг гүйцэтгэгч асан, хошууч генерал Ч.Амарболд, Эргүүл хамгаалалтын газрын дарга асан, цагдаагийн хурандаа Ш.Батсүх, Нийслэлийн цагдаагийн газрын дарга асан, цагдаагийн хурандаа О.Зоригт, тус газрын Хэв журмын хэлтсийн дарга асан, цагдаагийн дэд хурандаа Г.Ганбаатар нарт холбогдох хэргийн шүүх хурал өнгөрөгч хоёрдугаар сарын 27-ны өдөр товлогдсон ч шүүгдэгчийн өмгөөлөгч ирээгүй гэсэн үндэслэлээр хойшилсон юм.

Цагдаагийн томоохон албан тушаал хашиж байсан эдгээр хүмүүс  2008 оны долдугаар сарын 1-ний үймээний үеэр галт зэвсэг хэрэглэсний улмаас дөрвөн хүний амь нас хохирч, зургаан хүний биед хүнд, хүндэвтэр, хөнгөн гэмтэл учруулсан хэрэгт буруутгагдан шүүлгэх  юм.

Хойшилсон шүүх хуралдаанд дөрвөн шүүгдэгч нараас гадна Ч.Амарболдын өмгөөлөгч О.Алтангэрэл2008 оны сонгуулийн дараахи үймээний үеэр Үндэсний аюулгүй байдлын зөвлөлийн дарга, гишүүдийг  шүүх хуралд оролцуулах хүсэлтийг бүрэлдэхүүнд уламжилсан.

Эл хүсэлтийн дагуу Ерөнхий сайд асан С.Баяр, Үндэсний аюулгүй байдлын зөвлөлийн гишүүн асан Д.Лүндээжанцан, Хууль зүй, дотоод хэргийн сайд асан Ц.Мөнх-Оргил  нарт Сүхбаатар дүүргийн шүүхээс  энэ сарын 3-ны өдөр шүүхийн  зарлан дуудах хуудсыг нь хүргүүлсэн байна. Харин Ерөнхийлөгч асан Н.Энхбаярт шүүхийн зарлан дуудах хуудсыг хүргүүлээгүй гэнэ.

Хуульд зааснаар өмгөөлөгчийн хүсэлтийн дагуу дуудагдсан дээрх дөрвөн албан тушаалтан заавал шүүх хуралд биечлэн оролцох албагүй юм байна. Шүүх хуралд гэрчийн мэдүүлгээ бичгээр ч уламжилж болох аж. Түүнчлэн уг хэрэгт хяналт тавьж буй прокурор Д.Лүндээжанцан нарыг шүүх хуралд оролцуулах шаардлага байхгүй, хавтаст хэргийн хүрээнд хянан хэлэлцүүлнэ гэж үзэж байгаа бол шүүх бүрэлдэхүүнд  энэхүү хүсэлтээ уламжлах эрхтэй.

Шүүх бүрэлдэхүүн гэрчээр оролцож буй хүмүүсийг зайлшгүй шүүх хуралдаанд оролцуулах ёстой гэсэн шийдвэрт хүрвэл тэднийг хуулийн хүрээнд дуудах, хүрэлцэн ирэхгүй бол албадан ирүүлэх арга хэмжээ авдаг байна. Энэ сарын 14-ны өдөр Сүхбаатар дүүргийн шүүх хуралдаанд Ч.Амарболдын өмгөөлөнч О.Алтангэрэл  Г.Ганбаатарын өмгөөлөгч Д.Оросоо, Ш.Батсүхийн өмгөөлөгч Б.Энхтунгалаг, үймээний үеэр буудуулж амиа алдсан Э.Доржсүрэнгийн аав Ц.Энхбаяр, түүний өмгөөлөгч О.Баасанхүү нар оролцоно.

Н.Түвшин