Монгол Улсын Ерөнхийлөгч Ц.Элбэгдорж 2010-2011 онд шилжих мөчид ард түмэндээ мэндчилгээ дэвшүүлэхдээ хундагатай архи бус, сүү барин мэндчилсэн билээ. Тэрээр ард түмэндээ архинаас татгалзаж, цагаан сүүгээ өргөж амьдаръя хэмээсэн. Тэгвэл Ерөнхийлөгчийн эл уриалгыг орон даяар хэрэгжүүлэх “Архигүй Монголын төлөө” аяныг танилцуулахаар Ерөнхийлөгчийн зөвлөх Ч.Сосормаа Булган аймагт ажиллаж байна. Тэрээр Булган аймгийн Хутаг-Өндөр, Баян-Агт, Булган, Бугат сумдад ажиллаж байгаа юм.

Тус аяныг орон нутгийн иргэдэд танилцуулах ажлыг Булган аймгийн Засаг даргын тамгын газар, тэр дундаа Баян-Агт сумынхан илүү их дэмжиж байгаа нь уулзалт ярилцлагын үед харагдаж байлаа. Баян-Агтчуудын хувьд архигүй болохын тулд Засаг даргын Тамгын газар, төрийн албан хаагчдаасаа эхэлж байгаа аж.

Өөрөөр хэлбэл, төрийн албан хаагчид ажлын цагаар ажлын байранд архи согтууруулах ундааг хэрэглэхээсээ татгалзжээ. Сумын Засаг дарга Л.Эрдэнэбилэг энэ уриалгыг дэмжиж, хэрэгжүүлэхийн тулд төрийн албанд ажиллаж буй эрчүүдтэй гарын үзэг зурж гэрээ байгуулсан байна.

Гэрээгээ зөрчсөн хүмүүст холбогдох арга хэмжээг авч байгаа гэдгийг ч зөвлөх Ч.Сосормаад уламжилсан юм. Энэ мэтчлэн Баян-Агчууд архинаас татгалзаж эхэлжээ. Цаашид найр, наадмыг архигүйгээр тэмдэглэж, нутгийн брэнд болсон айргаа сөгнөж байхыг ард иргэддээ уриалж байв. Ямартай ч Баян-Агтчууд Булган аймаг цаашлаад Монгол Улсад архинаас татгалзаж чадсан жишиг сум болно гэдгээ тус аяныханд амласан юм.

Одоо Ч.Сосормаа Булган аймгийн төвд төрийн албан хаагчид болоод ерөнхий боловсролын сургуулийн сурагчид, МСҮТ-ийн оюутнуудтай уулзаж, Ерөнхийлөгчийн гаргасан уриалгыг танилцуулж, архи хэмээх хортой ундааны хор уршгийн талаар лекц уншиж байна. Тэрээр маргааш Булган аймгийн Бугат сум болон Орхон аймагт ажиллана.