1995 оноос өмнө тэтгэвэрт гарсан иргэд өнөөдөр хамгийн бага тэтгэвэр авч зутруухан амьдарч байна. Эдгээр хүмүүсийг шинэ цагийн хэлмэгдүүлэлтэд өртөгсөд гэж нэрлэх болж. Тухайн үед нийт 300 гаруй мянган хүн албадан тэтгэвэрт сууж байсан бол өнөөдөр 168 мянга болтлоо буурсан байна. Тэгвэл ээлжит бус чуулганы хуралдаанаар эдгээр ахмадуудын гомдлыг тайлах горьдлого бий болжээ. Нийгмийн даатгалын сангаас олгох тэтгэвэр тэтгэмжийн тухай хуульд нэмэлт оруулах тухай, Нийгмийн даатгалын тухай хуулиудыг хэрэглэх журмын тухай хуульд нэмэлт оруулах тухай хуулийн төслүүдийн эцсийн хэлэлцүүлгийг хийж, олонхи гишүүн дэмжсэнээр чуулганы ээлжит бус хуралдаанд оруулахаар болж тогтсон юм. Энэхүү хуулийн төслүүдийг УИХ-ын нэр бүхий гишүүд санаачлан боловсруулсан бөгөөд 1995 оноос өмнө тэтгэврээ тогтоолгосон ахмад настнуудын тэтгэврийн зөрүүг арилгах зорилготой. Тодруулбал, 1995 оноос өмнө тэтгэвэрт гарсан буюу тэр оны хөдөлмөрийн хөлсний хэмжээгээр тэтгэврээ тогтоолгосон  168  мянган хүн одоо бий. Хууль батлагдвал энэ хүмүүсийн тэтгэврийн зөрүү арилна гэсэн үг. 1995 оноос өмнө тэтгэвэрт гарсан хүмүүсийн одоо авч байгаа тэтгэвэр 1995 оноос хойш тэтгэвэрт гарсан хүмүүсийнхтэй адилхан болно. Шинэ  цагийн хэлмэгдүүлэлтээр  ажилласан жил, хүүхдийн тоог харгазан тэтгэвэрт суулгасан нь Үндсэн хууль зөрчсөн үйлдэл байсан гэж өнөөдөр хуульчид үздэг. Төр нүгэлээ наминчилж  өндөр настнуудын тэтгэврийн зөрүү гэдэг гомдлын нэр томъёог арилгах эсэх нь ээлжит бус чуулганаар шийдэгдэх үү гэдэг үлдэж байна. Хууль санаачлагачдын үзэж буйгаар ээлжит чуулганаар батлахгүй бол хаврын чуулганаар нийгмийн чанартай, томоохон хуулиуд батлагдана гэж байхгүй. Улстөр хэт халсан үед  тэтгэврийн зөрүүг арилган гэж ярихгүй хэмээн таамаглаж байгаа юм.