Хөхний хавдар нь эмэгтэйчүүдэд хамгийн түгээмэл тохиолдох хавдруудын нэг аж. Эрүүл мэндийн яам, Эрүүл мэндийн газар, "Мянганы сорилтын сан"-аас хөхний хавдрын  илрүүлэг энэ сараас эхлэн жил бүр  тогтмол явагдахаар болжээ. Уг үзлэгт 30-60 насны эмэгтэйчүүд хамрагдах бөгөөд харьяа өрхийн эмнэлэг болон эрүүл мэндийн газарт хандах аж. Энэхүү үзлэгийг боломжит үзлэгийн хэлбэрээр буюу умайн хүзүүний хавдрын илрүүлгийн шинжилгээнд хамрагдсан болон аливаа бусад шалтгаанаар эрүүл мэндийн төвдөө хандсан бүх эмэгтэйчүүдэд хийх юм. Түүнчлэн хавдрын өндөр эрсдэлтэй эмэгтэйчүүд буюу ээж, эгч, дүү зэрэг ойрын садан нь хөхний хавдраар өвдөж байсан, мөн нэг хөх нь хавдраар өвдөн эмчлүүлж байсан эмэгтэйчүүд жил бүр өрх, сумын эмчийн дуудаж зөвлөснөөр Бүсийн оношлогоо эмчилгээний төвд хандан маммографийн шинжилгээг хийлгэх шаардлагатай. Харин хөхний хавдрын эрсдэлгүй эмэгтэй сар бүр хөхөө өөрөө тэмтэрч шалгах бөгөөд хэрэв ямар нэг өөрчлөлт илрэхгүй бол 3 жилийн дараа өрх, сумын эмчийн дуудсанаар хөхний эмнэлзүйн үзлэгийг хийлгэх аж.