Байгаль орчин, аялал жуулчлалын сайд Д.Цогтбаатар энэ сарын 9-ний өдөр “Газар ашиглуулах зөвшөөрөл олгохыг түр зогсоох тухай” А-112 тоот тушаал гаргажээ.  Уг тушаал гарснаар дархан цаазат Богдхан уулын хязгаарлалтын бүсэд газар ашиглах зөвшөөрөл олгохыг, түүнчлэн хориглосон хугацаанд газар ашиглахыг хүссэн иргэн, аж ахуйн нэгжийн хүсэлтийг хүлээж авахгүй болохыг албан ёсоор баталгаажуулсан байна. Байгаль орчин, аялал жуулчлалын яамны захиалгаар хийгдэж байгаа "Богдхан уулын дархан цаазат газрын хязгаарлалтын бүсэд аялал жуулчлал явуулах даац, нөөцийн судалгаа" сэдэвт шинжлэх ухаан-технологийн төслийн эцсийн үр дүн гарч,  цаашид аялал жуулчлалын чиглэлээр энэ бүсэд хэрэгжүүлж болох төслийн талаар тодорхой шийдэлд хүрэх хүртэл энэ тушаал мөрдөх юм. "Тусгай хамгаалалттай газар нутгийн тухай" хуульд заасны дагуу дархан цаазат газрын хязгаарлалтын зөвшөөрөгдсөн бүсэд Монгол Улсын иргэн, аж ахуйн нэгж, байгууллагад тодорхой зориулалт, хугацаа, болзолтойгоор байгаль орчинд сөрөг нөлөөгүй арга, хэлбэрээр гэрээний үндсэн дээр газар ашиглуулж болдог. Газар ашиглагч нь газрын унаган төрхийг хадгалах, хамгаалах, нөхөн сэргээх арга хэмжээг өөрийн хөрөнгөөр гүйцэтгэх үүрэг хүлээдэг бөгөөд ашиглаж байгаа газрынхаа төлөв байдал, ашиглалтын зориулалтыг өөрчлөхөд хүрвэл зураг төслөө төрийн захиргааны төв байгууллагад хянуулж зөвшөөрөл авах; газар  ашиглах эрх дуусгавар болоход ашиглаж байсан газраа нөхөн сэргээж, засч тохижуулан хамгаалалтын захиргаанд хүлээлгэн өгөх ёстой. Хуулийн дагуу тус бүсэд газар ашиглах тухай хүсэлтийг иргэд, аж ахуйн нэгжүүдээс өнгөрсөн хугацаанд байнга ирүүлж байв. Харин цаашид тус бүс нутагт хуулийн дагуу газар ашиглах зөвшөөрөл олгохгүй болсныг дээрх тушаалаар баталгаажуулжээ. П.Наран