Манай улс жилдээ ойролцоогоор 260-280 мянган тонн мах бэлтгэж үүнийхээ 10 хүрэхгүй хувийг экспортонд гаргадаг юм байна. Харин цаашид махны экспортыг нэмэгдүүлэхийн тулд төрөөс бодлогын түвшинд дэмжих шаардлагатай гэж албаныхан мэдэгдсэн байна. Өнөөдрийн байдлаар малчид жилд 9 сая орчим малаа зарж борлуулдаг бол улсын хэмжээнд үйл ажиллагаа явуулж байгаа бүртгэлтэй болон бүртгэлгүй 130 гаруй ААН-үүд жилдээ 260-280 мянган тонн мах бэлтгэн гаргаж байгаа юм байна. Харин манай улс махны дотоодын хэрэглээгээрээ дэлхийд дээгүүр байранд тооцогдож, жилдээ 230 мянга орчим тонн мах хэрэглэдэг аж. Хэдий манай улс хүн амынхаа тооноос хэд дахин илүү тооны малтай ч өнөөдөр 1 кг махыг бараг 10 мянган төгрөгөөр худалдан авч байгаа асуудал шүүмжлэл дагуулсаар өдийг хүрлээ. Мэргэжлийн байгууллагаас энэ асуудлыг зохицуулах талаар удаа дараа мэдэгддэг ч төдийлөн үр дүнд гарахгүй байсаар байгаа юм. Албаныханы хэлж байгаагаар нийлүүлэлтийг нэмэгдүүлэх асуудлыг чухалчилдаг ч үүнээс илүүтэйгээр нэг малаас авах ашиг шимийн хэмжээг нэмэгдүүлэх саналыг дэвшүүлсэн байна. Б.Буянзаяа