Пакистанд хосуудын зөрчилдөөн хэмээх  гэрлэхийг  татгалзсаны хариуд эрэгтэй нь эхнэр болох эмэгтэйнхээ нүүрэнд хүхрийн хүчил цацдаг хүчирхийлэл ихээр гардаг. АНУ-ын кино академийн богино хэмжээний баримтат киноны төрөлд түрүүлсэн “Saving face” киногоор Пакистаны эмэгтэйчүүдийн зовлонг дэлхий даяар мэдэх болсон. Энэ кинонд гардаг шиг эмгэнэлт явдлын бодит жишээ нь  38 удаа нүүрэндээ мэс засал хийлгэсэн нэгэн хохирогч эмэгтэй Италид амиа хорлосон явдал юм. Пакистаны өмнөд хэсгийн Карачигаас ирсэн мэдээллээс үзэхэд Карачигийн уугуул асан бүжигчин (биеэ үнэлэгч) Факра Юунас хэмээх эмэгтэй 3 сарын 17-нд Ром хотын захын дүүргийн орон сууцны 6 давхраас үсрэн амиа хорложээ. Тэрбээр амиа хорлох үедээ 33 настай байсан бөгөөд 2000 онд хүхрийн хүчил нүүрэндээ цацуулж 3 жилийн дараа Италид оргон ирсэн аж. Нөхөр нь нөлөө бүхий хүн байсан учраас уг хэрэг тухайн үед гадаад дотоодын олны анхаарлыг татаж байв. Тэрбээр бага насаа Карачигийн биеэ үнэлэгчдийн гудамжинд өнгөрөөжээ. Мөн ээж нь геройны донтон байв. Тэрээр 10 орчим наснаасаа “бүжигчин” болж, гэр бүлээ тэжээдэг байсан бөгөөд 15 насандаа хүүхэд төрүүлжээ. 1997 онд 18 насандаа Билал Кхар гэгч эрэгтэйтэй гэрлэсэн бөгөөд нөхөр нь тухайн үед 30 гаран настай байв. Гурван ч удаа гэрлэсэн ба гэрлэх үйл ажиллагаа бараг 3 жил үргэлжилсэн байна. Тэрээр нөхрийнхөө оюун санааны болон биеийн харгис хүчирхийлэл болон ээжээсээ зугатан Италид ирсэн ажээ. Т.Од