УИХ-ын гишүүн Д.Загджав, Д.Тэрбишдагва, Д.Балдан-Очир, Ч.Улаан, Ц.Шинэбаяр, Ц.Даваасүрэн, О.Чулуунбат, Р.Раш,  нар Төрийн ордны “Г” танхимд хэвлэлийн хурал хийж байна. Энэ удаагийн хурлаар дээрх нэр бүхий гишүүд ХЗДХ-ийн сайд Ц.Нямдоржийг үүрэгт ажлаас нь чөлөөлөх, 2008 оны долдугаар сарын 1-ний хэрэг, Орон нутгийн сонгуулийн тухай хуулийн талаар хэвлэл мэдээллийнхнтэй чөлөөт ярилцлага өрнүүлнэ гэв. Д.Загджав: 2008 оны долдугаар сарын 1-ний өдөр өрнөсөн эмх замбараагүй байдлаас үүдэн олон хүн хохирсон. Мөн экс Ерөнхийлөгч Н.Энхбаярыг баривчлах үеэр хууль хяналтын байгууллага хэрхэн ажиллаж, иргэдэд ямар сэтгэгдэл төрүүлээд байгаа билээ. Энэ бүхний өмнө салбар хариуцсан сайд нь хариуцлага хүлээх ёстой. Ч.Улаан: Нэр бүхий арван нэгэн гишүүний өргөн барьсан тогтоолын төслийг долоо хоногийн дотор хэлэлцэх ёстой. Гэтэл өнөөдрийг болтол уг асуудлыг хэлэлцээгүй байна. Энэ төслийг ойрын хугацаанд хэлэлцээчээ. Бидэнд үүнээс чухал хийх ажлууд байгаа. Намын бүлгийн хурлаар сонгуулийн  мөрийн хөтөлбөрийн талаар хэлэлцээд 14 хоног боллоо. 2008 онд ард түмэндээ амласан 1.5 сая төгрөгөө иргэддээ өгөх ёстой. Энэ асуудлыг хэлэлцсэнээс гурав хоногийн дотор Засгийн газар энэ ажлыг зохион байгуулах ёстой байсан. Гэтэл өнөөдрийг болтол ямар нэг шийдэл гараагүй банйа. Ирэх долоо хоногт сонгуулийн компанит ажил эхлэх гэж байна. Сонгууль эхлэснийг зарлах гэж байна. Дараагийн сонгууль болох гэж байхад өмнөх амлалтаа биелүүлээгүй байж болохгүй. Мөн улс эх орны баялаг гадныханы гарт шилжих гэж байна. Энэ талаар яагаад төр, засаг дуугарахгүй байна вэ. “Саусгоби сэндс”, “Оюутолгой”-н асуудлаар гишүүд асуудал тавиад удаж байна. Монголчуудын эрх ашигт нийцэхгүй байгаа эдгээр асуудлаар төр, засаг тодорхой байр суурь илэрхийлээч. Одоо бий болсон алдаа, эндэгдлийг яаралтай оруулж ирэхийг шаардаж байна. Ирэх даваа гарагаас бид эдгээр асуудлаар маш хатуу байр суурь илэрхийлнэ. О.Чулуунбат: Одоогоос хоёр сар гаруйн өмнө бид УИХ-д улсын төсвийн мөнгийг нэг компани авч ашиглаж байна. Энэ мөнгийг эргүүлэн авч чадахгүй хэчнээн хугацаа өнгөрч билээ. Гэтэл бид ард иргэддээ амласан мөнгөө өгч чадахгүй хэчнээн хугацаа өнгөрч байна вэ. Нэг компанийн эрх ашгаас нийт монголчуудын эрх ашиг чухал гэдэг асуудал чухал гэдэг байр суурь, тогтолцоо руу шилжих хэрэгтэй байна. Д.Тэрбишдагва: Манай газрын баялагт гадныхан санаа зовоод байх юм. Байгалийн баялагыг маань улсаас улс руу дамнуулж худалдах юм. Хэт авлигад идэгдсэн Засгийн газрын талаар олон улсын нэгэн шинжээч ийм зүйл бичсэн байна. “Монголчууд дундын сан байгуулж, газрын баялагаа эргэлдүүлэх нь монголчуудын ирээдүйд хэрэгтэй. Засгтийн газар нь өөрсдийнх нь баялагыг ингэж зөөж, түүнийг нь гадны компаниуд дамнуулан худалдаж ашиг олж байхыг харсан хэн бүхийн шүлс асгарч байна. Энэ асуудлыг монголын ард түмэн хэрхэн хардаг нь сонин”. Манай улсын ирээдүйд гадны нэг шинжээч ингэж санаа тавьж байхад бид ийм байдлаар өөрсдийн асуудалдаа анхаарлаа хандуулж болохгүй. Хэвлэлийн хурлын төгсгөлд хэвлэлийнхний зүгээс дээрх гишүүдийг УИХ-д бүлэг болон гарахаар зэхэж байгаа талаар мэдээлэл гарсан. Энэ үнэн үү? гэхэд “Одоогоор тийм зүйл бид яриагүй байгаа” гэв. Мөн экс Ерөнхийлөгч Н.Энхбаярыг баривчлах үеэр түүний гэрт байсныг “Хэрвээ бид тухайн үед тэнд байгаагүй бол юуг ч нуун дарагдуулах байсан юм билээ. Тэнд байсны хувьд бид гэрч болсон гэж бодож байна” гэв. Энэ мэтчилэнгээр О.Чулуунбат нарын есөн гишүүн байр сууриа илэрхийлсэн юм. С.Жигүүр