Ах дүү ченжүүдийг хөнөөж, цогцос болон машиныг нь шатаасан Ш.Аделбек, К.Ерлан, Ж.Ганибет нар Улсын дээд шүүхэд гомдол гаргажээ. Тэдэнд өнгөрсөн оны аравдугаар сард Баян-Өлгий аймгийн шүүхээс шунахайн зорилгоор, дээрмийн гэмт хэрэг үйлдэхдээ бүлэглэн хоёр хүний амийг хөнөөсөн, бусдын эд хөрөнгийг санаатай галдан шатааж устгасан, улсын хил хууль бусаар нэвтэрсэн гэм буруутайд тооцож, Эрүүгийн хуулийн 89 дүгээр зүйлийн 89.1, 153 дугаар зүйлийн 153.2, 91 дүгээр зүйлийн 91.2.1, 91.2.6, 91.2.7, 91.2.11, 91.2.16 зүйл ангиар буруутган цаазаар авах ял оноосон юм. Гэвч тэд анхан шатны шүүхийн шийдвэрийг эсэргүүцэн давж заалдсан ч давж заалдах шатны шүүхээс тэдэнд оноосон ялыг хэвээр нь баталсан.