Орхон аймгийн Засаг дарга асан Д.Оюунбат хяналтын шатны шүүхэд хандана

Орхон аймгийн Засаг дарга Д.Оюунбат хууль бус үйлдлээ АТГ-ын Мөрдөн шалгах хэлтэст хэдэн сар шалгуулж эцэст нь Баянзүрх дүүргийн шүүхээс 2.4 жилийн хорих ял авсан юм. Тэрбээр анхан шатны шүүхийн шийдвэрийг эсэргүүцэн давж заалдах шатны шүүхэд гомдол гаргасан ч нийслэлийн Шүүхээс  2.4 жилийн хорих ялыг нь хэвээр баталсан байна.  Д.Оюунбат нь Орхон аймгийн Засаг даргаар ажиллаж байхдаа албан тушаалаа урвуулан ашиглаж улсад их хэмжээний хохирол учруулсан гэм буруу нь шүүхээр тогтоогдсон билээ. Тодруулбал, Д.Оюунбат нь таван тэрбумын өртөгтэй цэнгэлдэх хүрээлэн барих тендерийг авсан ч гурван тэрбумыг "тоншсон" нь мөрдөн байцаалтаар тогтоогдсон байна. Өөрөөр хэлбэл түүний босгосон цэнгэлдэх хүрээлэнг мэргэжлийн экспертүүд үзээд хоёр орчим тэрбум төгрөгийн хөрөнгө оруулалтаар барьсан  гэж дүгнэсэн аж. Түүнчлэн аймагтаа “Бурхан багшийн сэрэг дүр” нэртэй хөшөө босгосон “Тод-жаргал” ХХК нь Д.Оюунбаттай үгсэн хуйвалдаж тендер шалгаруулалтад оролцоогүй, татварт өртэй зэрэг хууль зөрчсөн үйлдлээ шүүлгэсэн юм. Тэрбээр хяналтын шатны шүүхэд гомдол гаргахаар болжээ.

Говьсүмбэрийн Засаг дарга Ж.Баянмөнхийн хэргийг прокурор хянаж байна

Авлигатай тэмцэх газрын Мөрдөн шалгах хэлтсийнхэн хавтаст хэргүүдийнхээ тоог нэгээр нэмж Говь-Сүмбэр аймгийн Засаг дарга Ж.Баянмөнхийг өнгөрөгч жилээс мөрдөж эхэлсэн юм. Түүнд холбогдох албан тушаалын хэргийг АТГ-аас шалгаж дуусч, нийслэлийн Прокурорын газрын хяналтад шилжүүлжээ. Ж.Баянмөнх нь  “Илчлэг шивээ” үйлдвэрийн газрыг өөрийн найздаа хувьчлахын тулд өмч хувьчлалын комисс болон доод тушаалтнууддаа хууль бус шаардлага тавьж, дарамталсан гэх гомдол анх АТГ-т иргэдээс ирсэн аж. Тэрбээр Улаан­баатар хотод хоёр байртай. Жилдээ 100 саяын орлоготой, түүнчлэн ямар ч дуудлага худалдаагүйгээр өөрийн эзэмшилд авсан долоон газартай. Аймагтаа нэг байрны ор­цыг нь авч 2, 3, 4 дүгээр давх­рын гурван айлын байрыг нэгтгэн хоёр хүүдээ өгсөн  гэдэг. Тэгэхдээ өрхийн эмнэлэг ба­рих нэрээр төсвөөс хөрөнгө гаргуулан хүүхдүү­дийн­хээ орон байрыг за­сч өгсөн тухай  баримтууд Авлигатай тэмцэх газарт шалгагдаж буй хавтаст хэрэгт нь бий. Хэрэв түүний гэм буруу нь шүүхээр тогтоогдвол 5-10 жилийн хорих ялаар шийтгүүлнэ.

Увсын Засаг дарга Э.Цасчихэрт ял төлөвлөнө

Төсвийн мөнгө шамшигдуулсан гэх хэрэгт холбогдоод буй Увс аймгийн Засаг дарга Э.Цасчихэрийг тус аймагт өнгөрсөн онд барихаар төлөвлөсөн Нарийны голын 325 м, Тээлийн голын 75.3 м гүүрийн барилгын ажлыг өөрийн “Мөнхжим” компаниар гүйцэтгүүлэхээр 710 сая төгрөг авсан хэрэгт анх шалгаж эхэлсэн билээ. Түүнчлэн төрийн албан хаагчдын таван давхар орон сууцыг дөрвөн давхар болгон барьсан гэх иргэдийн мэдээллээр АТГ-т шалгаж эхэлсэн. Уг хэргийн мөрдөн байцаалт дуусч ял төлөвлөхөөр болжээ.

Түүнээс гадна Увс аймгийн Засаг дарга Э.Цасчихэр болон бусад албан тушаалтны хууль бус үйл ажиллагааны улмаас иргэн Б 26 сая төгрөг завшиж, үрэгдүүлэх боломж олгосон гэмт хэрэгт Авлигатай тэмцэх газрын Мөрдөн шалгах хэлтэс мөрдөн байцаалтын ажиллагаа явуулж дуусгасан юм. Улмаар Эрүүгийн хуулийн 263 дугаар зүйлд заасан “Төрийн албан тушаалтан албан тушаалаа урвуулсан”, 150 дугаар зүйлд заасан “Төрийн өмчийг завшиж үрэгдүүлсэн” гэсэн үндэслэлээр яллах дүгнэлт үйлдүүлэхээр Увс аймгийн прокурорын газарт шилжүүлсэн ч хэрэгсэхгүй болгож байв. Гэвч дээд шатны прокурор түүнд холбогдох хэргийг дахин шалгаж шийдвэр гаргасан юм.

СХД-ийн Засаг дарга Ц.Болдын хэргийн мөрдөн байцаалт  дуусна

Сонгинохайрхан дүүргийн Засаг дарга Ц.Болдыг АТГ-аас эрүүгийн хэрэг үүсгэн шалгаад багагүй хугацаа өнгөрч байна. Түүнд хамаарах Эрүүгийн хуулийн 150.3-т зааснаар буюу бусдын эд хөрөнгийг завшсан гэх хэргийн мөрдөн байцаалтын ажиллагаа дуусах шатандаа орсон талаар эх сурвалж мэдээллээ.

Албаны  эх сурвалжийн мэдээллээр Ц.Болдыг цас хайлуулах бодисонд төсөвлөсөн хөрөнгөөс 300 сая гаруй төгрөг хувьдаа завшсан хэрэгт буруутгаж, УМБГ-т шалгаж байсан ч албан тушаалтай холбоотой учир АТГ-т шилжүүлэн шалгуулжээ.

Өнгөрсөн оны есдүгээр сард уг хэрэгт холбогдуулан нийслэлийн Захирагчийн ажлын албаны Орчины бохирдол, хог хаягдлын менежментийн хэлтсийн дарга Б.Дэлгэрбаярыг шалгаж, цагдан хорьсон юм. Хэвлэлд гарсан мэдээллээр бол тэднийг хамтран цас хайлуулах бодис авах нэрийдлээр жил бvр тєсєвт мєнгє суулгаж, хувьдаа завшсан байж болзошгүй гэж үзэж байгаа юм.

Хөвсгөл аймгийн Засаг дарга Л.Цэрэнжав тэрбум төгрөгөөр тансаглав

Хөвсгөл аймгийн цагдаа, эмнэлгээс бусад нь Засаг даргынх болсон хэмээн иргэд сүүлийн хэдэн жил ярьсан. Тус аймгийн Засаг дарга Л.Цэрэнжавыг аймгийнхаа 80 жилийн ойг тэмдэглэхэд Засгийн газрын тогтоож өгсөн хэм хэмжээ болох 10 сая төгрөгийг хэтрүүлэн нэг тэрбум төгрөгөөр наадам тэмдэглэсэн гэх юм билээ. Түүнийг дээрх асуудлаар АТГ-аас шалгаж байгаа юм байна.

Их хэмжээний газрын наймааны хэргээр Булган аймгийн Засаг дарга шалгагдаж байна

Булган аймгийн Засаг дарга М.Оюунбатыг тус аймгийн Хишиг-Өндөр сумын Засаг дарга Г.Ганхуягийн хамт АТГ-т шалгаж байгаа. Тэднийг “UFС” групп болон зарим нэр бүхий компанид их хэмжээний газар олгосон гэх хэрэгт сэжигтнээр татагджээ.

Налайхын Засаг дарга Б.Баяндэлгэрийн гэм буруу тогтоогдсонгүй

Налайх дүүргийн Засаг дарга Б.Баяндэлгэр Авлигатай тэмцэх газрын мөрдөгчийн овоо хараанд өртөн өнгөрөгч оноос албан тушаал, авлигын хэрэгт холбогдон шалгагдаж эхэлсэн юм.  Түүний 300 га газрыг БНСУ-ын хөрөнгө оруулалттай “Жэхуан групп”-т их хэмжээний мөнгөөр зарахыг завдаж, 320 га газар эзэмших гэрчилгээ олгож өгнө хэмээн амлаж 50 мянган ам. доллар хахуульд авсан гэх хэрэгт буруутгагдаж, сэжигтнээр татагдсан байна. Өөрөөр хэлбэл албан тушаалын байдлаа урвуулан ашиглаж онц их хэмжээний авлига авсан байж болзошгүй гэж сэжиглэгдсэн ч  мөрдөн байцаалтын явцад нотлогдоогүй аж.

Говь-Алтайн Засаг даргын хэргийг шүүх рүү шилжүүлнэ

АТГ-аас Говь-Алтай аймгийн Засаг дарга Ш.Амгаланбаярт холбогдох хэргийг шалгаж, яллах дүгнэлт үйлдүүлэхээр Нийслэлийн прокурорын газарт шилжүүлжээ. Засаг дарга Ш.Амгаланбаярыг албан тушаал, эрх мэдлээ хэтрүүлэн тендергүйгээр бараа, ажил, үйлчилгээ худалдан авч, танил талынхаа компанид давуу эрх олгосон хэрэгт буруутгаж буй юм. Тухайлбал, ХХААХҮЯ-наас хөдөө аж ахуйг дэмжих зорилгоор 200 сая төгрөгөөр трактор, комбайн худалдан авах эрх олгосон аж. Гэтэл Засаг дарга Ш.Амгаланбаяр “Агсу-Алтай” гэх компанид тендергүйгээр 100 сая төгрөг шилжүүлж комбайн авсан. Үлдсэн 100 саяыг нь хувьдаа завшсан гэх. Орон нутагт барьж буй барилгын зураг төслийг хувийнхаа компанид давуу эрх олгон хийлгэж байсан гэх хэрэгт холбогджээ. Харин Нийслэлийн прокурорын газрын эх сурвалж “Түүнд Эрүүгийн хуулийн 263 дугаар зүйлд заасан албан тушаал, эрх мэдлээ урвуулсан гэсэн үндэслэлээр яллах дүгнэлт үйлдэж, шүүхэд шилжүүлэхээр болсон байна.

Н.Түвшин