Жанжин Сүхбаатарын талбайд өнөөдөр “Эх орон-Тусгаар тогтнол-Шударга ёс” хөдөлгөөнийхөн “МАХН-ын дарга Н.Энхбаярыг сулла” гэсэн шаардлага тавьж, жагсаал зохион байгуулахаа мэдэгдээд байсан юм. МАХН-ын дарга Н.Энхбаярыг баривчилсаныг эсэргүүцэж, жагсаал цуглаан зохион байгуулахаар өдрийн 13.00 цагт товлосон ч холбогдох албаныханаас шаардлагатай зөвшөөрөл аваагүй хэмээн Сүхбаатар дүүргийн Цагдаагийн хэлтэсээс тэднийг хэсэг саатуулсан юм. Цагдаа нар тэдний хөгжим, чанга яригч, индэр зэргийг талбайруу нэвтрүүлэхгүй хэмээн хориглож, хурааж авна хэмээн саатууласан ч жагсагчдийн эсэргүүцэлтэй тулгарсан тул Сүхбаатарын талбай руу нэвтрүүлсэн. МАХН-ын дарга Н.Энхбаярыг суллахыг шаардсан энэхүү жагсаалд Монголын эмэгтэйчүүдийн холбоо, Эрс шинэчлэл хөдөлгөөн, Миний монголын газар шороо хөдөлгөөн, Үндэсний хас хөдөлгөөн, Монгол улсын үндэсний аюулгүй байдлын төлөө зүтгэе хөдөлгөөн, Тусгаар тогтнол эвсэл, Амлалт нэхэх ард түмний холбоо, Монгол цэргийн бэлтгэл хүчний холбоо, Даяар монгол хөдөлгөөн, Алтан ураг Чингүнжав сан ТББ, иргэдийг гэмт халдлагаас хамгаалах төв ТББ, Гонгоржавын бошигт сан, Стратеги судлалын хүрээлэн ТББ, Тусгаар тогтнолын төлөө нэгдэгсэд, Нийгмийн хүч либериал залуучуудын холбоо зэрэг нам, хөдөлгөөн, эвсэл, холбоо, ТББ-уудын төлөөлөл болон хөдөө орон нутгаас ирсэн иргэд оролцож байгаа гэдгийг зохион байгуулагчдийн зүгээс мэдэгдлээ. Гэхдээ жагсаалд дээрх хөдөлгөөнүүдийн төлөөлөл болсон залуучуудын оронд  тэтгэврийн насны ахмад буурлууд олноор ирсэн байгаа харагдсан. Тэднээс хаанаас ямар хөдөлгөөнийг дэмжиж байгааг тодруулахад “Сайн мэдэхгүй байна. Иргэдийн дуу хоолой болон ирснээ л мэдэж байна. Хэн зохион байгуулж байгааг сайн мэдэхгүй байна” гэсэн хариултын цөөнгүй хүн хэлж  байлаа. Ямартаа ч, яг одоо Сүхбаатарын талбай дээр иргэний хөдөлгөөнийхөн гэх 100 гаруй хүн Н.Энхбаярыг суллахыг шаардаж, эсэргүүцлээ илэрхийлсэн жагсаалаа эхлүүлээд байнa.   П.Наран Н.Ариунаа