Н.Энхбаяр Цагдан хорих байрны дотоод журам зөрчжээ
ШШГЕГ-ын дэд дарга бөгөөд Тогтоол гүйцэтгэх газрын дарга, хурандаа Т.Батболд өнөөдөр 14.30 цагаас МАХН-ын дарга Н.Энхбаярын хоригдож буй нөхцөл байдалтай холбогдуулан сэтгүүлчдэд мэдээлэл хийлээ.
Албаны эх сурвалжийн хэлж буйгаар сэжигтэн Н.Энхбаярыг энэ сарын 13-ны өдрийн 07.00 цагт Төв аймгийн Цагдан хорих төвд хүлээн авч сэжигтнээр татан биед нь эрүүл мэндийн үзлэг хийхэд гэмтэл илрээгүй. Эрүүл мэндийн байдал нь хэвийн байсан гэнэ.
Тиймээс тус ангийн холбогдох ажилтан цагдан хорих байрны дотоод журмын 2.3 дахь хэсэгт зааснаар буюу цагдан хоригдсон этгээдэд цагдан хорих байрны цагийн хуваарь, эрх үүргийг танилцуулж тэмдэглэл үйлдэн, гарын үсэг зуруулах журмыг танилцуулж гарын үсэг зуруулахыг хүссэн боловч сэжигтэн Н.Энхбаяр зөвшөөрөөгүй аж.
Түүнчлэн цагдан хоригдсон этгээдэд хориглох зүйл гэсэн журмын 1.1.7 буюу гар утас болон бусад холбооны тоног төхөөрөмж эд ангийг ашиглахыг хориглосон заалтыг зөрчин өмгөөлөгч О.Баасанхүүгээр дамжуулан гар утас авч хоригдож буй өрөөндөө ашигласан зэрэг зөрчил гаргасан байна.
Төв аймгийн Цагдан хорих төвийн байранд сэжигтэн Н.Энхбаярыг хорихдоо зохих хуулийн дагуу төрийн тусгай хамгаалалтын газраас хяналт тавьж, өдөрт хоёр удаа эмчийн үзлэгээр оруулж эрүүл мэндийн байдалд нь анхаарал тавьж байна гэл ээ. Түүнчлэн хуулиараа прокурорын байгууллага цагдан хорих үйл ажиллагаанд хяналт тавьдаг юм байна. Мөн цагдан хорих байрны дотоод журмын дагуу хоригдсон этгээд захидал, цахилгаанаар харилцах гэсэн заалтын 7.2-т буюу цагдан хоригдсон этгээдэд ирсэн болон түүний явуулсан захидлыг, цахилгааныг хамгаалалтын ажилтнаар дамжуулан хорих байрны захиргаанд хүргүүлнэ гэсэн заалтыг зөрчсөн байна. Тэрбээр мөн л өмгөөлөгчөөрөө дамжуулан олон нийтэд захидал илгээсэн нь нь дээрх заалтыг зөрчжээ.
Өөрөөр хэлбэл Сэжигтэн Н.Энхбаяр хоригдсон 13 хоногийн хугацаандаа цагдан хорих байрны дотоод журмын 1.1.7, 7.2, 2.3 дахь хэсэгт заасан журмыг зөрсөн учраас 15 хоногийн хугацаатай сахилгын шийтгэл оноохоор байсан гэнэ. Гэвч тус хорих ангиас экс Ерөнхийлөгчид хүндэтгэлтэй хандах үүднээс сахилгын шийтгэлийг түр хугацаагаар оногдуулахыг хойшлуулсан байна. Гэхдээ удаа дараа хорих байрны дүрэм зөрчвөл сахилгын шийтгэл оноохоо албаны хүмүүс мэдэгдлээ.
Энэ үеэр хурандаа Т.Батболд ”Хэвлэл мэдээллийн байгууллагаар манай байгууллагын үйл ажиллагаатай холбоотой бодит бус мэдээлэл гарч байна. Тухайлбал Хууль зүй дотоод хэргийн сайд Ц.Нямдорж хорих ангид очиж сэжигтэн Н.Энхбаяртай уулзаагүй. Бид хуулийн хүрээнд зохих журмын дагуу Н.Энхбаярын таслан сэргийлэх арга хэмжээг хэрэгжүүлж байна. Ямар нэгэн байдлаар хүний эрх зөрчсөн, дарамт шахалт үзүүлсэн зүйл байхгүй” гэсэн мэдээллийг өглөө.
Дашрамд дурдахад АТГ-ын Мөрдөн шалгах хэлтэст Эрүүгийн хуулийн 264.3 дахь хэсэгт зааснаар сэжигтнээр татагдсан Н.Энхбаярыг цагдан хорих хугацаа маргааш өглөөний 07.00 цагт дуусгавар болно. Гэхдээ прокурорын хүсэлтээр шүүхээс цагдан хорих арга хэмжээг хэвээр үлдээвэл маргаашнаас үргэлжлүүлэн хорих юм. Зарим эх сурвалжийн мэдээллээр түүнд холбогдох хэргийн мөрдөн байцаалт дуусч, яллагдагчаар татаж байгаа юм байна.
Н.Түвшин
СЭТГЭГДЭЛ БИЧИХ