МАХН-ын дарга Н.Энхбаярын  хоригдож буй нөхцөл байдлын талаар ШШГЕГ-ын дэд дарга бөгөөд Тогтоол гүйцэтгэх газрын дарга, хурандаа Т.Батболд мэдээлэл өгөх үеэр цөөн асуултад хариулт авлаа.

-Н.Энхбаярыг өдөрт хоёр удаа эмчийн  үзлэгт оруулж байгаа гэсэн мэдээллийг та өгсөн. Бусад сэжигтэн яллагдагчийн эрүүл мэндэд танай хорих ангийнхан хэр анхаарал  тавьдаг вэ?

-Төрийн тэргүүн байсан гэдэг үүднээс Н.Энхбаярын эрүүл мэндэд хуулийн дагуу зохих байдлаар хандаж байгаа. Даралт, нойр нь хэвийн. Төрийн тусгай хамгаалалтын газраас сэжигтэн Н.Энхбаярын хоригдож буй нөхцөлд өдөр бүр  хяналт тавьж байна. Бусад сэжигтнүүдийг эрүүл мэндийн үзлэгт оруулдаг.

-МАХН-ын гишүүдийн зүгээс танай хорихын үйл ажиллагаанд саад учруулсан тохиолдол бий юу?

- Хэвлэл мэдээллийн байгууллагаас бодит бус мэдээлэл маш их цацаж байна. Хууль зүй, дотоод хэргийн сайд Ц.Нямдоржийг Төв аймгийн Цагдан хорих ангид очиж манай ажилтнуудыг дарамталсан гэх зэргээр ташаа мэдээлэлд няцаалт өгье. Түүнчлэн Төв аймгийн Цагдан хорих ангийг эрүүдэн шүүдэг маш хүнд нөхцөлтөй хорих байр гэж хүртэл бичиж байна.  Бас л ташаа мэдээлэл. Олон улсын хүний эрхийн байгууллагаас хийсэн дүгнэлтээр Төв аймгийн Цагдан хорих ангийн байр хэвийн  үзүүлэлтэй гарсан.

- Төв аймгийн Цагдан хорих төвийн байрны дотоод журмыг Н.Энхбаяр удаа дараа зөрчсөн гэсэн. Сахилгын арга хэмжээ авахгүй байгаа учир нь юу вэ. Дотоод журмаа мөрдүүлэхгүй бол батлах хэрэг байсан уу?

-Өмгөөлөгчөөрөө дамжуулан гар утас хорих байранд нэвтрүүлсэн, цагдан хорих байрны дотоод журмын 2.3 дахь хэсэгт зааснаар буюу цагдан хоригдсон этгээдэд цагдан хорих байрны цагийн хуваарь, эрх үүргийг танилцуулж тэмдэглэл үйлдэн, гарын үсэг зуруулах журамд сэжигтэн Н.Энхбаяр гарын үсэг зурахаас  татгалзсан, захидал харилцаа дамжуулахдаа журам зөрчсөн зэрэг зөрчил гаргасан. Хуульд зааснаар 15 хоногийн хугацаагаар саатуулах арга хэмжээ авч болно.  Гэхдээ   сахилгын арга хэмжээг хойшлуулсан. Учир нь сүүлийн өдрүүдэд хэвлэл, мэдээллийн хэрэгслээр Төв аймгийн цагдан хорих газар бол сэжигтнүүдтэй зүй бусаар харьцаж, тамлан зовоодог, Н.Энхбаярын эрх тэнд хэтэрхий зөрчигдөж байгаа гэхчлэн мэдээлж байгаа нь ард иргэдэд ташаа ойлголт төрүүлж байна. Тиймээс Н.Энхбаярт сахилгын арга хэмжээ авахыг хойшлуулсан, нөгөө талаар  эрхэлж байсан ажилд нь  хүндэтгэл үзүүлсэн.

- Н.Энхбаярт хүндэтгэл үзүүлж сахилгын шийтгэл оноохоос татгалзсанаараа хүн бүр хуулийн өмнө тэгш эрхтэй байр зарчмыг алдагдуулж байгаа юм биш үү. Ер нь  танай хорих ангиудад хоригдсон төрийн өндөр албан тушаалтнуудад ийм байдлаар хүндэтгэл үзүүлж дотоод журмаа зөрчсөөр байх уу?

-Хэвлэл мэдээллээр  бодит бус мэдээллүүд гарч, янз бүрийн өнцгөөс тайлбарлаж байгаа нь олон нийтэд ташаа ойлголт төрүүлж байна. Хэрэв сэжигтэн Н.Энхбаярыг 15 хоног хорих сахилгын шийтгэл оноовол, хүний эрх зөрчсөн, дарамт шахалт үзүүлж байна гэсэн мэдээлэл гарахаас сэргийлсэн.

Дашрамд дурдахад МАХН-ын дарга Н.Энхбаярыг өнөөдөр  07.00 цагаас эхлэн үргэлжлүүлэн хоёр сар хорих шийдвэрийг Сүхбаатар дүүргийн шүүхээс гаргасан.

Тэгэхээр түүнд холбогдох албан тушаалын хэргийг мөрдөн байцаах ажиллагаа дуусч, нийслэлийн Прокурорын газарт  яллах дүгнэлт үйлдүүлэхээр шилжүүлжээ. Түүнийг  зах зээлийн үнэлгээгээр 605 сая төг­рөгийн үнэтэй нийслэлийн өмчийг үнэ­гүйдүүлж завшсан, 2.1 тэрбум төг­рөгөөр үнэлэгдэх нийслэлийн өмчит үйлдвэрийн газрыг үнэгүйдүүлж завш­сан, 113.4 мянган ам.долларын үнэ бүхий телевизийн 11 нэр төрлийн 46 ширхэг тоног төхөөрөмжийг албан тушаалын байдлаа ашиглан хувьдаа завшсан, төрийн өмчийг онц их хэмжээгээр үрэгдүүлсэн гэх үйлдлийг нь шалгаж яллах дүгнэлт үйлджээ. Н.Энхбаярыг Эрүүгийн хуулийн тусгай ангийн 150 дугаар зүйлийн 150.3-д зааснаар гэм буруутайд тооцон шалгаж байгаа юм. Хэрэв шүүхээр гэм буруу нь тогтоогдвол 5-10 жилийн хорих ялаар шийтгүүлнэ. Уг хэргийн талаар АТГ-ын Мөрдөн шалгах хэлтсийн дарга Э.Амарбат  “Н.Энхбаярыг яллагдагчаар татах хангалттай баримт бий” гэсэн мэдээллийг хэвлэлийн хурлын үеэр өгч байсан билээ.

Н.Түвшин