Өнөөдөр орон даяар “Эрүүл мэнд – Эрхэм баян” уриан дор  зохиогдсон Эрүүл мэндийн нээлттэй өдөрлөгт эрүүл мэндийн байгууллагууд бүтэн өдрийн туршид өөр өөрийн үйл ажиллагааны чиглэлээр хүссэн иргэдэд тухайн нөхцөлд үзүүлэх боломжтой үзлэг, шинжилгээг хийж, сургалт сурталчилгаа явууллаа. Сүхбаатарын талбай болон аймгуудын төв талбай дээр зохион байгуулсан үзлэг шинжилгээ дараах төрлүүдээр хийгдсэн юм. Тухайлбал, цусан дахь сахарын шинжилгээ, ХДХВ/ДОХ-ын шинжилгээ, харшлын сорил, харшлын үзлэг, хараагаа шалгуулах, даралтаа хэмжүүлэх, цусны донор болох, жин өндрөө хэмжүүлэх, цусны бүлгээ тодорхойлуулах,эмийн зохистой хэрэглээний зөвлөмж, зөв хооллолтын зөвлөгөө, бэлгэвч авах зэрэг үйлчилгээнд хамрагдав. Өдөрлөгийн үеэр Сүхбаатарын талбай дээр байрласан нүүдлийн нөхцөлд ерөнхий мэс засал хийх, шүд эмчлэх, рентген оношлогоо хийх тусгай техник,тоног төхөөрөмжөөр тоноглогдсон нүүдлийн эмнэлгээр үйлчлүүлж, үзлэг, шинжилгээ хийлгэх хүсэлтэй хүмүүс өдөрлөг эхэлсэн цагаас дуусах хүртэл маш олноороо дугаарлан зогссон байсан юм. Дашрамд дуулгахад, эрүүл мэндийн нээлттэй өдөрлөгт 16.00 цагийн байдлаар 24584 иргэд оролцсон аж. Мэдээллийг бүх эрүүл мэндийн байгууллагуудаас ирүүлсэн тоог нэгтгэн гаргасан бөгөөд нийслэлийн үзлэг шинжилгээнд зургаан мянган хүн, мэдээлэл сурталчилгаанд гурван мянган хүн, нийт 21 аймгийн хэмжээнд үзлэг шинжилгээнд 10 мянга орчим хүн, мэдээлэл сурталчилгаанд таван мянган хүн хамрагдсан байна.       П.Наран