Монгол Улсад генерал цол олгож эхэлсний 68  жилийн ойг өнгөрөгч баасан гаригт Таван толгой дахь Зэвсэгт хүчний Сургалтын нэгдсэн төвд тэмдэглэн өнгөрүүллээ. Энэ үеэр Генералуудын хөрөг зургийн үзэсгэлэн, Цэргийн дуу бүжгийн эрдмийн чуулга, Үлгэр жишээ үлээвэр найрал хөгжмийн тоглолт, Зэвсэгт хүчний 032, 084-р ангийн жагсаалын болон гардан тулааны үзүүлбэр, обьект чөлөөлөх ажиллагаа, Афганистанд Бельгийн вант улсын дайчидтай хамтран үүрэг гүйцэтгэх Цэргийн багийн Энхийг дэмжих ажиллагааны сургалт, Зэвсэгт хүчний зэвсэглэлд сүүлийн жилүүдэд шинээр нэвтэрсэн зэвсэг, техникийн үзэсгэлэнг зохион байгуулжээ.   1944 оны дөрөвдүгээр сарын 28-нд анх 11 офицерт генерал цол олгосноос хойш эдүгээ хүртэл цэргийн энэ эрхэм дээд цолыг 158 хүн хүртээд байгаа ба тэдний 84 нь энх тунх байдаг аж. Харин 20-иод нь БХЯ, ЗХЖШ, ХХЕГ, ЦЕГ, ТЕГ, ШШГЕГ, Дотоодын цэрэгт удирдах албан тушаал хашдаг байна. Монголын генералуудаас өдгөө хамгийн ахмад нь 93 настай хошууч генерал Т.Алтангэрэл, хамгийн залуу нь 40 настай хошууч генерал Б.Баярмагнай, бригадын генерал Л.Онцгойбаяр нар юм. Энэ удаагийн Генералуудын баярын арга хэмжээнд 68 генерал оролцсон бөгөөд тэдний 50 нь гэр бүлийн хамт ирсэн аж. Генералуудад Батлан хамгаалахын сайд Ж.Энхбаяр, ЗХЖШ-ын дарга, дэслэгч генерал Ц.Бямбажав нар хоёр нүдний дуран, цэргийн хээрийн хувцас зэргийг дурсгалаа. Мөн Батлан хамгаалахын сайдын тушаалаар дэслэгч генерал Л.Моломжамц, Г.Дамдинсүрэн, хошууч генерал Д.Магсаржав, А.Ганбат нарын 22 генералд зуслангийн хаус, эдлэн газрын хамт өгөх, эсвэл түүнтэй тэнцэх мөнгөн урамшуулал олгох эрхийн батламжийг гардуулав. Генералуудын нийгмийн баталгааг сайжруулах үүднээс энэ арга хэмжээг 2011 оноос хэрэгжүүлж байгаа бөгөөд өнгөрөгч жил БХЯ-наас Хандгайтад таван генералд зуслангийн хаус барьж өгчээ.   Мөн энэ орой Монгол Улсын Ерөнхийлөгч, Зэвсэгт хүчний Ерөнхий командлагч Ц.Элбэгдорж генералуудыг “Их тэнгэр” цогцолборт хүлээн авч хүндэтгэл үзүүлсэн байна.   П.Наран