АНУ-ын Төрийн Департаментаас Украины ерөнхий сайд асан Юлия Тимошенког АНУ-ын ЭСЯ-нд хүргэхийг шаардсан талаар РИА Новости мэдээлэв. Төрийн нарийн бичгийн дарга Хиллари Клинтон мягмар гаригт Ю.Тимошенкод эмнэлгийн тусламж яаралтай үзүүлэх болон АНУ-ын ЭСЯ-нд очих боломжоор хангахыг Украины Засаг захиргаанд бичсэн байна.  Ю.Тимошенко болон бусад хоригдлуудын талаар АНУ санаа зовниж байгаа гээд саяхан нийтлэгдсэн Тимошенкогийн зурагнаас түүний хоригдож байгаа нөхцөл байдлын талаар тайлбар өгөхийг хүссэн ажээ. Түүнчлэн Тимошенко болон түүний удирдлагад ажиллаж байсан засаг захиргааны бусад гишүүдийг суллахыг  АНУ  шаардаж байгаа талаар Х.Клинтон тэмдэглэжээ. Өнгөрсөн долоо хоногийн мягмар гаригт түүнийг хорихоос эмнэлэг рүү хүргэх замдаа гар хөлийг нь мушгин, гэдэс рүү нь цохисон талаар Ю.Тимошенко прокурорт гомдол мэдүүлсэн юм. Украинд болж байгаа үйл явдлыг эсэргүүцэн өлсгөлөн зарлаж байгаагаа Тимошенко мэдэгдсэн ч Украины хууль хяналтын байгууллагаас өөрийн ажилтнуудаа хамгаалсан байр суурь илэрхийлсэн байна. Дашрамд Юлия Тимошенкод өнгөрсөн оны аравдугаар сард ОХУ-тай 2009 онд байгалийн хийн гэрээ хийхдээ эрх мэдлээ хэтрүүлсэн гэж долоон жилийн хорих ял оноосон бөгөөд одоо тэрээр Харьковын хориход хоригдож байгаа юм. Өнгөрсөн дөрөвдүгээр сарын 19-нд Харьковын шүүхээс Тимошенкогийн удирдаж байсан “Украины эрчим хүчний нэгдсэн систем” корпорацийг санхүүгийн луйвар хийсэн гэж буруутган шинэ хэргийг түүний эсрэг  үүсгээд байна.