УИХ-ын чуулганы хуралдаанаар Хууль зүй, дотоод хэргийн сайд Ц.Нямдоржийг огцруулах эсэх асуудлыг хэлэлцлээ. Экс Ерөнхийлөгчийг баривчлах үеэр УИХ-ын гурван гишүүний бүрэн эрхэд халдсан гэж үзэн, хөндөгдөж буй уг асуудлын талаар УИХ дахь Ардчилсан намын бүлэг Хууль зүй, дотоод хэргийг огцруулах нь зүйтэй гэж үзэж буйгаа илэрхийлсэн. Харин МАН-ын бүлэг Хууль зүйн сайдыг огцруулах шаардлагагүй хэмээн үзэж байгаагаа илэрхийлээд байгаа билээ. УИХ-ын нэгдсэн чуулганаар уг асуудлыг хэлэлцэх үеэр гишүүдийн асуусан асуултад Хууль зүй, дотоод хэргийн сайд дараахи хариултыг өгч байлаа. Н.Батбаяр: Та ирэх сонгуулиар Увсаас нэр дэвших үү, намынхаа далбаан дор орж пропорциональ 28-аас нэр дэвших үү Ц.Нямдорж: Энэ бол миний цэвэр халдашгүй дархан эрхийн асуудал. Би хэнээс ч асуухгүй шийдвэрээ гаргана гэж хариулсан юм. С.Эрдэнэ: Таныг бусдын хаусанд амьдардаг, хоригдлуудаар хаус бариулсан. Хаусыг тань барьж байсан хоригдол нь амь үрэгдсэн, орондоо хууль зассан гээд олон зүйл дуулддаг. Та ухамсраараа дүгнэлт хийгээд энэ албан тушаалаа дараагийн хүндээ тавиад өгч болдоггүй юм уу. Та албан тушаалтанд хариуцлага тооцдог хуулийг зассан, ашигт малтмалын хуулийг зассан. Таны зассан хуулийн балгаар олон хүн ял завшиж, улс оронд ихээхэн хохирол учирсан. Та сандал ширээтэйгээ зууралддаггүй гэж хэлж байсан. Гэтэл одоо яагаад үхэн хатан тэмцээд байгаа юм бэ. Ц.Нямдорж: Миний энэ ажлыг хэзээ өгөхийг УИХ шийдэх ёстой. Намайг УИХ ёс зүйтэй, ажлаа хийж чадна гээд томилсон. Би энэ төрд шургалсан муу сүлжээг таслах гэж олон жил явж байгаа. 2006 онд нэг сүлжээг тасалсан. 256 сая ам.долларын үнэтэй сүлжээ байсан. Одоо ч том сүлжээг таслах гэж байна. Үүнд дургүйлхсэн хүмүүс нууц гэрээ байгуулж улсаа худалдах гэж байна. Би хулгай хийхгүй байхыг, тендэрт хүйтэн гараа дүрэхгүй байхыг, нууц гэрээ байгуулахгүй байхыг ёс зүй гэж үздэг. Ер нь би айван тайван сонгууль хийх боломжийг олгочихоод ажлаа хүлээлгэж өгөх юм сан гэж бодож байгаа. Олон жил Хууль зүйн сайд хийлээ. Ерөнхийлөгчид ч энэ үгээ хэлсэн. Д.Загджав: Бид тодорхой үндэслэлээр уг асуудлыг оруулж ирж байгаа. Засгийн газрын гишүүний хувьд тэр бүх зүйл дээр улс төрийн хариуцлага хүлээх ёстой. Хойшлуулашгүй ажиллагаа хийгдэх үеэр тэнд нэг ширхэг цагдаа харагдсан бол тэнд оролцсон гэсэн нотолгоо болно. Энэ асуудал дээр цагдаа оролцсон, оролцоогүй гэж ярих нь өрөөсгөл ойлголт юм. Бүх зүйлийг ард түмэн харсан. Тиймээс бид нийгмийн хэв журам алдагдаж, ард иргэдийн амгалан тайван байдал байхгүй болж, жирийн иргэний эрхэд халдсан. Ийм байдлаар УИХ-ын үдээс өмнөх нэгдсэн чуулган өндөрлөсөн юм. Үдээс хойш 15.00 цагаас уг асуудлыг үргэлжлүүлэн хэлэлцэх хурал цагаасаа 35 минутаар хоцорч эхэллээ. С.Жигүүр