Хэвлэл мэдээллийн салбарт галын шугаманд  ажилладаг эмэгтэй гэрэл зурагчдын “Амьдралын өнгө-2” үзэсгэлэн өнөөдөр “Улаанбаатар хотын музей”-д нээгдлээ. Хоёр дахь жилдээ зохион байгуулж буй энэ үзэсгэлэнд “Өнөөдөр” сонины Г.Эрдэнэтуяа, “Camera shop”-ын захирал С.Бадамханд, “Өдрийн шуудан” сонины Т.Чимгээ, shuud.mn сайтын Н.Ариунаа нарын “Амьдралын өнгө-2” сэдэвт гэрэл зургуудийг түүвэрлэн дэлгэжээ. Хүний ертөнцийн энгийнээс авахуулаад ер бусын байж мэдэх эгэл агшнуудыг бүсгүй хүний нүдээр гэрэл зургийн хальснаа буулгаж амжсан 99 зураг бүхий тус үзэсгэлэн энэ сарын 11-ний өдрийг хүртэл дэлгэгдэх юм. Дашрамд дуулгахад, тус үзэсгэлэн Японы нийслэл Токио хотод энэ сарын дундуур үргэлжлэн гарах ажээ.   Энэ үеэр манай Shuud.mn  мэдээллийн сайтын гэрэл зургийн сурвалжлагч Н.Ариунаатай цөөн хором ярилцлаа. -Эмэгтэй хүн гэрэл зургийн сурвалжлагч байх хэцүү юу? -Хэцүү үе тохиолддог. Мэргэжлийн аппаратаа үүрээд тухайн үйл явдлын цорын ганц давтагдашгүй агшинг мэдэрч дарна гэдэг багагүй цаг хугацаа шаардсан ажил. Зургаа агшинг нь тааруулж, авахын тулд өвлийн хүйтэнд, зуны халуунд хичнээн ч цаг хүлээхийг таах аргагүй. Хамгийн сүүлд л гэхэд Монгол Улсын ерөнхийлөгч асан Н.Энхбаярын баривчилгаааны үеэр хөл нь гозойгоод баригдаад явж байгаа тэр зураг. Тэр орой л гэхэд бүтэн 12 цагийн турш гадаа даарч зогссон. -Үзэсгэлэнд тавигдсан зургуудаа хэзээ авсан бэ? -Миний энэ удаагийн үзэсгэлэнд тавьсан бүтээлүүд маань Shuud.mn  мэдээллийн сайтад ажилласнаасаа хойш авсан гэрэл зургууд. Гэрэл зургууд маань бүгд түүх өгүүлж байгаа. -Ажлаа хийгээд цаг наргүй явахад ар гэрийнхэн дургүйцдэг үү? -Үгүй. Намайг сэтгэл тайван ажлаа хийхэд минь тусалж, дэмжиж, ойлгодог ханьдаа юуны түрүүнд баярлалаа гэж хэлмээр байна. Мөн аав, ээждээ, гэр бүлийнхэндээ бүгдэд нь баярлалаа. Та  нар минь миний ажил амжилтын үндэс.   П.Наран