Эрүүл мэндийн яаманд өнөөдөр экс ерөнхийлөгч Н.Энхбаярын биеийн байдлын талаар эмч мэдээлэл өгнө гэсэн мэдээлэл бидэнд ирсэн юм.  Биднийг очиход тус яамнаас мэдээлэл өгөхгүй харин эмчлэгч эмч нь мэдээлэл өгнө гэж мэдэгдсэн бөгөөд багагүй хүлээлгэсний эцэст МАХН-ын ерөнхий нарийн бичгийн дарга Н.Удвал тэргүүтэй гурван хүн гарч ирэв. Н.Удвал даргатай гарч ирсэн хоёр хүний нэг нь экс ерөнхийлөгч Н.Энхбаярыг үзсэн эмч буюу Нэгдсэн II эмнэлэгийн хүний гавьяат эмч Р.Цэдэн-Иш байв.   Тэрбээр ЭМЯ-наас гарч ирэн машиндаа яаран сууж, хөдлөхөөр завдах тэр агшин хэвлэлийнхэн түүнээс цөөн асуултад хариу авав. -Өлсгөлөн зарлаад байгаа экс ерөнхийлөгчийн биеийн байдал ямар байна вэ? -Хүндхэн байгаа -Ямар арга хэмжээ авах гэж байна? -Яаралтай хүчээр эмнэлэгт албадан эмчлэх шийдвэр гарсан -Төрийн тусгай хамгаалалтад байх ёстой тул  түүнийг Нэгдсэн II дугаар эмнэлэгт хэвтүүлэх үү? -Тэр асуудлыг хуулийн байгууллага шийдэх байх. Гэхдээ ШШГЕГ-ын харъяа Шинэ хорих ангийн эмнэлэгт хэвтүүлнэ гэж дуулдсан. Би мэдэхгүй.   Тэрбээр  бидний асуултад нэмж хариулах зүйлгүй хэмээн явж одсон тул МАХН-ын ерөнхий нарийн бичгийн дарга Н.Удвалтай уулзахаар тус намын байрыг зорив. -Экс ерөнхийлөгчийн биеийн байдал ямар байна? -Одоогоор манай намын дарга өчигдөр өглөөний 07.00 цагаас эхлэн хуурай өлсгөлөн зарлаж, амандаа юу ч хүргээгүй байгаа. Би эмч хүн. Өлсгөлөн зарласан хүн ямар байдалтай болдогийг сайн мэднэ. Хуурай өлсгөлөн зарлах нь илүү аюултай, тухайн хүний амь насны тухай асуудал. Ус уухгүй удвал бие организмд ус дутагдсанаас бөөрний дутагдалд орж, цус өтгөрч, шоконд ордог юм.   Мөн тэрбээр экс еөр бие  нь муудлаа гэсэн даруйд бидний зүгээс гайгүй эмч хайтал олдохгүй байсан. Монгол улсын ерөнхийлөгч байсан хүний хувьд эмчлээд өгөх сэтгэлтэй хүн олдохгүй л юм байна. Түүний ар гэрийнхэнийг нь ядаж уулзуулахгүй байна. Ар гэрийнхэн нь уулзвал түүний шийдвэрт нөлөөлж чадах болов уу гэж бид найдаж байгаа. Гэтэл эмчлэгч эмч нь хүртэл мэдээлэл өгөхгүй зугтах шахам яваад өгсөнд гайхаж байна гэв.   Энэ үеэр УИХ-ын гишүүн Д.Тэрбишдагва экс ерөнхийлөгчийн асуудлаар Төв аймаг дахь Авдрантын хорих ангиас ирлээ хэмээн Н.Удвал даргатай уулзахаар ирсэн байв. -МАХН-ын дарга Н.Энхбаяртай уулзсан уу. Биеийн байдал нь ямар байна? Би өнөөдөр 11.50 цагт Хорих анги дээр очсон.  Хорин ангийн дарга, эмч нараас зөвшөөрөл авч түүнтэй уулзахыг хүссэн ч боломж олдсонгүй.  Н.Энхбаяр дарга одоогийн байдлаар 30 гаруй цаг өлсгөлөн зарлаад байна. Эмчлэгч эмчээс нь авсан мэдээллээр зүрхний цохилт нь 100 гарч, уруул ам нь хатсан байдалтай байгаа гэж байна. Түүнтэй уулзах эрхийг олгох шүүх хяналтын байгууллагынхан хүн ёсоор хандаж, гэр бүлийнхнийг нь ядаж уулзуулаад өгөөч гэж маш ихээр хүсч байна. Мэдээж гэм буруутайг нь тогтоохоор хууль хяналтынхан ажиллах нь зөв. Гэхдээ түүний амь насны асуудал яригдаж байгаа энэ үед гэр бүлийнхэн нь л түүнд нөлөөлж чадна гэлээ.   Хамгийн сүүлд авсан мэдээллээр МАХН-ын гишүүд дэмжигчид Төв аймгийн Авдрант дахь хорих ангийн гадна  цуглаад байгаа гэнэ. Учир нь экс ерөнхийлөгчийг Хорих 461 дүгээр ангийн эмнэлэгт шилжүүлэхээр холбогдох албаныхан тус газрыг зорисон юм байна.   П.Наран