“Дархан Эдийн засгийн чуулган- 2012” уулзалт өнгөрсөн баасан гарагт Дархан-Уул аймагт болжээ. Тус чуулган олон улсын болон Монголын эдийн засгийн форумын зохион байгуулалтын жишгээр орон нутагт анх удаагаа зохион байгуулагдсан байна. Энэхүү чуулганд Сангийн сайд Д.Хаянхярваа, Дархан-Уул аймгийн Засаг дарга Г.Эрдэнэбат, Үндэсний хөгжил, шинэтгэлийн хорооны дарга Ч.Хашчулуун болон бусад шийдвэр гаргах төвшний хүмүүс, төрийн бус байгууллага, бизнес, эрдэмтэн мэргэд, иргэний нийгмийн төлөөлөгчид оролцжээ.
Дархан-Монгол Улсын загвар хот болгох ажлын хүрээнд уг чуулганыг гурван хэлэлцүүлгийн хүрээнд зохион байгуулсан бөгөөд “Хот төлөвлөлт”, “Үйлдвэржилт”, “Төр хувийн хэвшлийн түншлэл” буюу хамтын ажиллагааг хөгжүүлж механизмын талаар хэлэлцэж, нэгдсэн шийдэлд хүрсэн байна.
Чуулга уулзалтын үеэр нефтийн үйлдвэр барихад 600 сая ам.доллар, төмөрлөгийн үйлдвэрт 100 сая ам.доллар, үйлдвэр технологийн паркийг 12 тэрбум төгрөг, мэдээлэл харилцааны технологид суурилсан “Smart city” буюу ухаалаг хот цогцолборт 40 тэрбум төгрөг зарцуулбал Дархан-Уул аймаг улсын хүнд үйлдвэрийн төв болж, хөгжлийг тодорхойлогч хотын эгнээнд очих боломжтойг шийдвэрлэх албаныханд дуулгасан байна.
Д.Цэцэг
СЭТГЭГДЭЛ БИЧИХ