Манай улсын арилжааны банкинд бохир мөнгө угаасан гэх хэргийг ТЕГ-ын мөрдөн байцаах хэлтэст шалгаж байгаад прокурорын хяналтад шилжүүлсэн гэх мэдээлэл зарим хэвлэлд гарчээ. Уг хэрэгт Соловьев Александр Сергеевич гэх Белорусс, Киргизийн харьяалалтай иргэн холбоотой гэх мэдээлэл ч байгаа юм. Дээрх мэдээллийн талаар Нийслэлийн прокурорын орлогч Е.Сагсайгаас тодрууллаа. -Монгол Улсын арилжааны банкинд мөнгө угаасан хэргийг прокурорт  шилжүүлсэн гэх мэдээлэл гарсан байна? -Хэрэгт хяналт тавьж байгаа.  Шалгаж дуусаагүй байна. -Гадаадын иргэн “Голомт” банкинд мөнгө угаасан нь тогтоогдсон гэдэг үнэн үү? -“Голомт” банкинд мөнгө угаасан нь тогтоогдсон гэдэг мэдээлэл ташаа. Бид тийм мэдээлэл цацсан хэвлэл, мэдээллийн хэрэгсэлд  залруулга хийлгэхээр албан бичгээр хандаад байна. Шүүхээр шийдэгдээгүй хэргийн талаар дэлгэрэнгүй мэдээлэл өгөхгүй.