Монгол улсын Засгийн газрын гишүүн, Эрүүл мэндийн сайд Н.Хүрэлбаатарын санаачлагаар “Эрүүл мэндийн сайдын нэрэмжит шагнал” шинээр төрөн гарчээ. Шагналын тухай 2012 оны 5-р сарын 4-ний өдөр хуралдсан Сайдын зөвлөлийн хурлаар хэлэлцэж, сайшаан баталсаны үндсэн дээр Эрүүл мэндийн сайдын “Эрүүл мэндийн яамнаас шагнал олгоход мөрдөх журам”-д нэмэлт оруулах тухай 161 тоот тушаал гарч, хэрэгжүүлж ажиллахаар болсон байна. Уг шагналаар хүн ардын эрүүл мэндийн төлөө үйлсэд үнэтэй хувь нэмэр оруулсан нийгмийн аль ч салбарын хүн шагнагдаж болох аж.   “Эрүүл мэндийн сайдын нэрэмжит шагнал”-ыг үе үеийн сайд нар уламжлуулан авч явах, билиг ерөөл дүүрэн, салбарын өндөр нэр хүндтэй шагнал болгохоор ийнхүү бүтээжээ.   Энэхүү шагнал нь ногоон хаш суурин дээр байрласан алтан хундагыг ороосон хүрэл могойн дүрс байх бөгөөд чулуун суурины хоёр хажуу талд алтан ялтас суулгаж өгчээ. Хаш чулуун суурины зөв талын ялтсан дээр монгол үсгээр “Эрүүл мэндийн сайдын нэрэмжит шагнал” гэсэн бичээсийг, эсрэг талын ялтсан дээр Монгол улсын Засгийн газрын гишүүн, Эрүүл мэндийн сайдын овог нэрийг тус тус бичжээ. Шагналын суурь 45х45х120 мм, хундага ороосон могойн өндөр 100 мм-ийн хэмжээтэй юм байна.   Түүнчлэн “Эрүүл мэндийн сайдын нэрэмжит шагнал” хүртсэн иргэнд хувийн дугаар бүхий үнэмлэх олгож байх аж.   П.Наран