УИХ-ын Хуульзүйн байнгын хороо шуурхай хуралдаж Монгол Улсын Ерөнхийлөгчөөс 2011 оны 06 дугаар сарын 29-ний өдөр УИХ-д өргөн мэдүүлсэн Шүүхийн захиргааны тухай хуулийн төслийн талаархи зарчмын зөрүүтэй  саналын томьёоллуудаар санал хураалт явууллаа. Тус байнгын хорооны өнгөрсөн долоо хоногийн хуралдаанаар дээрх хуулийн төслийн анхны хэлэлцүүлгийг хийх үед төслийн 13 дугаар зүйлийн 13.1, 13.2 дахь хэсэг буюу Шүүхийн Ерөнхий Зөвлөл /ШЕЗ/-ийн бүтэц, бүрэлдэхүүний асуудалд нэлээд нухацтай хандан, Ажлын хэсгийн түвшинд дахин хэлэлцэхээр нээлттэй үлдээсэн Тухайлбал, ШЕЗ-ийн дарга, гишүүдийг Монгол Улсын Ерөнхийлөгч томилох саналын тухайд шүүгчид болон шүүхийн захиргааны томилгоо Ерөнхийлөгч гэсэн нэг институцээс хараат байдалд орох вий хэмээх болгоомжлол байсан юм. Гишүүдийн дунд багагүй маргаан үүсгэсэн уг асуудлыг ажлын хэсэг дээр дахин нягталж хэлэлцсэний эцэст “Ерөнхий зөвлөл нь дарга, дөрвөн гишүүнээс  бүрдэх бөгөөд Ерөнхий зөвлөлийн бүрэлдэхүүнд УИХ, Ерөнхийлөгч, Засгийн газар, Улсын дээд шүүхээс томилсон тус бүр нэг хүн багтана” гэсэн томьёоллыг дахин оруулж иржээ. Үүнтэй холбогдуулан төслийн 18 дугаар зүйлийн 18.1.11 дэх заалтын “Ерөнхийлөгчид өргөн мэдүүлэх” гэснийг “томилсон байгууллагад мэдэгдэх” хэмээн өөрчлөх санал төсөлд туссан байна. Байнгын хорооны гишүүд ийнхүү зарчмын зөрүүтэй зургаан асуудлаар санал хураасны эцэст уг хуулийн төслийг дэмжсэн санал, дүгнэлтээ УИХ-ын чуулганы нэгдсэн хуралдаанд  Байнгын хорооны дарга Д.Одбаяр танилцуулахаар боллоо.