Монгол Улсын Засгийн газар хийж бүтээсэн ажлаа ард иргэддээ тайлагнах зорилгоор “Ардын засаг-Ард түмэнтэйгээ хамт” аян өрнүүлж эхэллээ. Аяны хүрээнд Засгийн газар, бүх яам, харьяа агентлаг хийж бүтээсэн ажлаа иргэддээ нээлттэй тайлагнаж, тэдний санал, бодлыг сонсон зөвлөгөө өгч, төрийн үйлчилгээг нэг цэгээс хүргэх аж. Тус аяны нээлт өчигдөр Д.Сүхбаатарын талбайд болж, Монгол Улсын Ерөнхий сайд С.Батболд болон Засгийн газрын бүх гишүүн оролцлоо.
Ерөнхий сайд С.Батболд хэлсэн үгэндээ Засгийн газраас хийж бүтээсэн томоохон ажил, үр дүнгийн талаар иргэдэд товч танилцуулсан байна. Эдийн засгийн бодит өсөлт 2008 онд 8.9 хувь байсан бол энэ онд 17.3 хувь болж өссөн, 2010 онд 39.2 хувьтай байсан ядуурлын түвшин өнгөрсөн онд 10 орчим хувиар буурч, Монгол Улс бага орлоготой орноос дунд орлоготой орны ангилалд шилжсэн, ажилгүйдэл 7.7 хувь хүртэл буурсан, хүний хөгжил, эдийн засгийн үзүүлэлт, өрсөлдөх чадвараараа олон улсын түвшинд байр сууриа ахиулсан.
Түүнчлэн байгалийн баялгаас анх удаа хувь эзэмших боломжийг бий болгож, иргэн бүрт 1 сая 500 мянган төгрөг олгох амлалтаа бодитоор биелүүлэх нөхцлийг бүрдүүлсэн, ард иргэдээ орон сууцжуулахын тулд “100 мянган айлын орон сууц” хөтөлбөрийг батлан, аль болох олон өрхийг хамруулах зорилгоор 6 хувийн хүүтэй зээл олгож эхэлсэн, сүүлийн гурван жилд 180 мянган ажлын шинэ байр бий болгон, 60 жилийн хугацаанд байгаагүй төмөр замын бүтээн байгуулалтыг эрчимтэй өрнүүлэх ажлыг энэ Засгийн газар эхлүүлж “Эрүүл хүүхэд” аянд хамрагдах ёстой нийт хүүхдийн 50 гаруй хувийг хамруулж байгааг ч тэмдэглэлээ. Мал сүрэг 36 сая толгойд хүрч сүүлийн хэдэн жил байгаагүй амжилтад хүрсэн, хөнгөн үйлдвэрийн тоо мөн онтой харьцуулахад 80 гаруй хувиар өссөн, мах, сүү, төмс, буудайгаа 100 хувь, хүнсний ногооны 53.6 хувийг дотоодоосоо хангадаг болсон. Өнгөрсөн дөрвөн жилийн хугацаанд цэцэрлэгүүдийн санхүүжилтийн хэмжээ 2.5 дахин нэмэгдэж 36 тэрбум төгрөгөөс 91 тэрбум болтлоо нэмэгдэж, 2009-2011 онд дунд сургуулийн багшийн дундаж цалин 264 мянган төгрөг байсан бол өнгөрсөн онд 381 мянга болж 44.5 хувиар нэмэгджээ. Цалин, тэтгэвэр, зарим тэтгэмжийг шат дараатайгаар 2-2.5 дахин нэмснээр төрийн албан хаагчдын цалинг дунджаар 630 мянга, тэтгэврийн дундаж хэмжээг 224 мянга, өрхийн сарын дундаж орлогыг 2011 онд 586 мянган төгрөгт хүргэсэн. Сар бүр “Хүний хөгжил сан”-гаас 21 мянган төгрөгийн хишиг, хувийг иргэн бүртээ хүртээж байгаа гэв.
Засгийн газрын тэргүүнийг танхимын гишүүдийнхээ хамт индэр дээр байх үед нэгэн иргэн гэнэтийн бэлэг барьсан юм. Тодруулбал, зургаан хувийн орон сууцны зээлд хамрагдаж гэр хорооллоос тохилог сууцанд шилжин амьдрах болсондоо талархаж байгаагаа нэгэн залуу илэрхийлж цэцгийн баглаа Ерөнхий сайд С.Батболдод барив.
“Ардын засаг-Ард түмэнтэйгээ хамт” аяны хүрээнд зохион байгуулсан тус өдөрлөгт оролцож байгаа бүх яам, агентлагийн ажилтай Ерөнхий сайд болон Засгийн газрын гишүүд танилцаж иргэдтэй ч ярилцав. НХХЯ өндөр настан болон хөгжлийн бэрхшээлтэй иргэдийг хувьцаа, эсвэл бэлэн мөнгө гэсэн хувилбараас алийг нь сонгох талаар асуумж авч дуусч байгаа тухай сайд Т.Ганди танилцууллаа. Асуумжаас үзвэл 200 гаруй мянган иргэн мөнгөө авах хүсэлтэй байгаа бол 100 гаруй мянган иргэн хувьцаагаа авна гэдгээ илэрхийлжээ.
Иргэд цалин хөлс, тэтгэвэр, тэтгэмжийн өсөлт, ажлын байрны талаар НХХЯ-ныхнаас сонирхож байсан бол Бүртгэлийн ерөнхий газрынхан цахим үнэмлэх, иргэний болон эд хөрөнгийн бүртгэлийн талаар мэдээлэл, зөвлөгөө авах гэсэн олны хөлд дарагдаж байлаа. Тэтгэвэр нэмэгдсэнд туйлын баяртай байгаагаа Ерөнхий сайдтай гар барьж уулзахдаа илэрхийлэх өндөр настан олон байлаа. Гүйцэтгэх засаглалын тэргүүн ажлын байрны лавлагаа авч, анкет бөглөн Хөдөлмөрийн биржид бүртгүүлж байгаа залуустай ярилцан, санал бодлыг нь сонсов. Хөдөлмөрийн биржийнхэн ажилд орох хүсэлтэй иргэдийг газар дээр нь бүртгэн мэдээллийн нэгдсэн сандаа оруулж байна. Өнөөдөр гэхэд л 50 гаруй хүн ажилд орохоор бүртгүүлсэн аж.
Удахгүй УИХ, Нийслэлийн Иргэдийн Төлөөлөгчдийн Хурлын сонгууль болохтой холбоотойгоор Бүртгэлийн ерөнхий газрынхан амсхийх завгүй ажиллаж байна. Тус газрынхан сонгогчдын бүртгэлийг гаргаж Сонгуулийн ерөнхий хороонд хүлээлгэн өгсөн бөгөөд иргэний үнэмлэхийг цахим үнэмлэхээр солих ажлаа төлөвлөсний дагуу явуулж байна. Тухайн иргэн www.registrationmongolia.com, www.burtgel.mn цахим хуудсанд нэвтэрч иргэний үнэмлэх болон регистрийн дугаараа оруулан сонгогчдын нэрсийн жагсаалтад бүртгэгдсэн эсэхээ мэдэх боломжийг ч бүрдүүлсэн тухай Бүртгэлийн ерөнхий газрын дарга энэ үеэр танилцуулж байв.
“100 мянган айлын орон сууц” хөтөлбөрийн хүрээнд хэрэгжиж байгаа зургаан хувийн хүүтэй зээл олгох журмын талаар нарийн ойлголт авах гэсэн олон хүн Зам, тээвэр, барилга, хот байгуулалтын яамныхантай уулзаж байсан бол Боловсрол, соёл, шинжлэх ухааны яамныхан Мэргэжлийн сургалт, үйлдвэрлэлийн төвд суралцах хүсэлтэй залууст зөвлөгөө өгч байв. Тус аяны хүрээнд иргэд өөрт хэрэгтэй мэдээ, мэдээлэл, зөвлөгөө, төрийн зарим үйлчилгээг газар дээрээс нь нэг цэгээс авч чадсандаа баяртай байгаагаа илэрхийлж байлаа.
Иргэд Батлан хамгаалах яамны танилцуулах хэсэгт багагүй саатсан юм. Учир нь тус яамны зүгээс Энхийг дэмжих ажиллагаанд оролцож байгаа цэрэг эрсийн хамгаалах хэрэгсэл, монгол цэргийн түүхэнд хэрэглэгдэж ирсэн буу зэвсэг зэргийг хамгийн ихээр сонирхож байгаа нь харагдсан. Харин залуус галт зэвсгийг барьж зургаа татуулж, үзэж сонирхсон бөгөөд тэдний дийлэнх нь цэрэгт явж үзээгүй гэдгээ хэлж байлаа.
Ийнхүү шинээр томилогдсон сайдуудын 100 хоногийн ажил, Засгийн газрын дөрвөн жилийн ажлыг тайлагнасан “Ардын засаг-Ард түмэнтэйгээ хамт” аян цаашид үргэлжлэх бөгөөд яам тус бүрээр нэг өдрийг сонгон ажлаа танилцуулах өдөрлөг зохион байгуулах аж.
П.Наран
СЭТГЭГДЭЛ БИЧИХ