Эмэгтэй боксчдын дэлхийн аварга шалгаруулах долоо дахь удаагийн тэмцээн БНХАУ-ын Чинхуандао хотод эхэлж эхний тулаанууд болжээ. Өчигдөр 51 кг-д Азийн мөнгөн медальт М.Нандинцэцэг ДАШТ-ий хүрэл медальт Финландын Ханне Макиненд 13:16-гаар дийлджээ. Мөн энэ үдэш 60 кг-д О.Сувд-Эрдэнэ дэлхийн аварга Румыний Михаела Чижевски-Лекетуштэй тааран 12:18-аар ялагдал хүлээж, манай эмэгтэй боксчид Лондоны олимпийг өнжих болов. Учир нь зөвхөн 51 кг, 60 кг, 75 кг-ийн жингийн шилдэг найман тулаанч олимпийн эрхээ биелүүлэх учиртай юм. 48 кг-д Азийн аварга Т.Болортуул эхний даваанд хийлж, Филиппиний Жоси Габучотой дараагийн даваанд тавдугаар сарын 15-нд тоглоно. 64 кг-д Азийн аварга Э.Уянга эхний даваанд хийлжээ. Дараагийн даваанд 15-нд Хорват, Туркийн аль ялсантай үзнэ. Ц.Баатар