1993 оны арван хоёрдугаар сарын 2-ны өдөр батлагдсан Цагдаагийн байгууллагын тухай хуулийн “Галт зэвсэг, тусгай хэрэгсэл хэрэглэхийг хориглох” гэсэн 46 дугаар зүйлд “Хүүхэд болон жирэмсэн болох нь илэрхий мэдэгдэж байгаа хүмүүст дор дурьдснаас бусад тохиолдолд галт зэвсэг, тусгай хэрэгсэл хэрэглэхийг хориглоно: 1\ энэ хуулийн 40.1.1-д заасан тохиолдолд 2\ галт зэвсэг хэрэглэж довтолсон буюу эсэргүүцсэн 3\ нийтийг хамарсан эмх замбараагүй байдал бий болсон буюу бүлэглэн довтолсон үед оролцсон хүмүүсийг дотор нь ялгах боломжгүй онцгой тохиолдолд” гэж заасан. Мөн 40 дүгээр зүйлд гэмт үйлдлийг өөр арга, хэрэгслээр таслан зогсоох боломжгүй бол цагдаагийн албан хаагч ямар тохиолдолд галт зэвсэг хэрэглэх талаар хуульчилсан байна. Гэхдээ энэ зүйлд нийтийг хамарсан эмх замбараагүй байдал бий болсон тохиолдолд зэвсэг хэрэглэх эсэх талаар заалт байхгүй байгаа юм байна. Тиймээс нийтийг хамарсан эмх замбараагүй байдал бий болсон буюу довтолсон үед оролцсон хүмүүсийг дотор нь ялгах боломжгүй онцгой тохиолдолд цагдаагийн албан хаагч галт зэвсэг хэрэглэж болохоор заасан хуулийн уг заалтыг хүчингүй болгох тухай хуулийн төслийг боловсруулжээ.