Засгийн газарт 536 ширхэг хувьцаагаа нэрлэсэн үнээр худалдах хүсэлтэй иргэний өргөдлийг хүлээн авч, иргэдийн нэрс, худалдах хувьцааны тоог нэгтгэн гаргах ажил энэ өдрүүдэд өрнөж байгаа. Тиймээс эзэмшиж байгаа хувьцаагаа Засгийн газарт нэрлэсэн үнээр нь худалдах хүсэлтэй байгаа иргэд өөрийн оршин суугаа сум, хорооны нийгмийн ажилтанд хүсэлтээ гаргах юм байна. Өргөдлийн загварыг Хөдөлмөр халамж үйлчилгээний газраас дамжуулан аймаг, дүүрэг, сум хороодод хүргүүлжээ. Хэрэв тухайн иргэн сум, хороонд очиж хүсэлтээ өгөх боломжгүй тохиолдолд хүсэлтийг гэр бүлийн гишүүдээс төлөөлөн гаргаж болох аж. Төлөөлөн гаргагч нь 16 хүртэлх насны хүүхдийн эцэг, эх, ах, эгч, эмээ, өвөө, асран хамгаалагч харгалзан дэмжигч, 16 ба түүнээс дээш насны иргэний эхнэр, нөхөр, хүү, охин “нотариатын тухай хууль”-ийн 4 дүгээр зүйлд заасны дагуу итгэмжлэгдсэн хүн байх ёстой юм. Хэрэв иргэд өмнө нь Хүний хөгжил сангаас хишиг, хувиа бэлэн мөнгө хэлбэрээр авахаар хүсэлтээ гаргасан ахмад настан, хөгжлийн бэрхшээлтэй иргэн, 2010-2011, 2011-2012 оны хичээлийн жилд сургалтын төлбөр хэлбэрээр хишиг, хувь хүртсэн оюутан, 2011 онд эрүүл мэндийн даатгалын шимтгэлийн төлбөр хэлбэрээр хишиг, хувь хүртсэн бол тухайн иргэнд ногдох хувьцаанаас хасч тооцохыг дээрх тогтоолд тусгажээ. Иймд эзэмшиж буй хувьцаагаа Засгийн газарт нэрлэсэн үнээр нь худалдах хүсэлтэй байгаа хүүхэд, иргэдийн хувьд энэ сарын 20-ний дотор өргөдлөө өгөх шаардлагатай аж. Энэ хугацаанд хувьцаагаа Засгийн газарт нэрлэсэн үнээр худалдах хүсэлтээ өгөөгүй иргэд болон бэлэн мөнгө хэлбэрээр нэг сая төгрөгийн хишиг, хувиа хүртэх хүсэлтээ гаргаагүй байгаа ахмад настан, хөгжлийн бэрхшээлтэй иргэн болон бусад хүмүүсийг хувьцаа авах хүсэлтэй гэж тооцох  юм байна.   Д.Цэцэг