МАН-ын бүлгийн дарга Н.Энхболд, УИХ-ын гишүүн Я.Содбаатар, УИХ-ын гишүүн С.Бямбацогт нар УИХ-ын чуулганы үйл ажиллагаанд үүсээд байгаа нөхцөл байдалтай холбоотой дөнгөж сая Төрийн ордонд мэдээлэл хийлээ. Тус намын бүлгийн дарга Н.Энхболд “МАН-ын Бага хурал болж байх дундуур АН хууль зөрчин чуулганыг хуралдуулж,УИХ-ын даргыг сонгосон мэдээлэл ирлээ. УИХ-ын даргыг сонгох тухай асуудлыг хуулийн хүрээнд явуулах ёстой гэж манай нам үзэж байгаа. Ингэж хуулийн хүрээнд явуулах нь хэд хэдэн ач холбогдолтой. Юуны өмнө УИХ-ын цаашдын үйл ажиллагаа нь тогтвортой олон түмний итгэлийг хүлээсэн хэмжээнд явуулах баталгааг хангах, хууль ёсны эрх мэдэлтэй байх цаашлаад УИХ-ын нэр хүнд тустай гэдэг байр сууринаас асуудлыг хуулийн дагуу явуулах шаардлага тавиад 3 хонож байна. Зөвшилцөх тухай асуудал бол өөрөө нарийн хуулиар зохицуулсан дэгтэй. Ялангуяа УИХ-ын даргыг сонгох тухай асуудал бол УИХ-ын тухай хуулийн тодорхой заалтуудаар зохицуулагдсан үйл ажиллагаа байна. УИХ-д аль нэг нам олонх болоогүй тохиолдолд хамгийн олон суудал авсан нам нь бусад нас эвсэлтэй зөвшилцөж, УИХ-ын даргыг нэр дэвшүүлж сонгоно гэсэн заалт бий. УИХ-ын даргыг сонгох ажлыг намын бүлгүүд байгуулагдаххаас өмнө нэр дэвшүүлдэг. Энэ нь МУ-ын Үндсэн хууль, бусад хууль тогтоомжид УИХ гишүүн бүр УИХ-ын даргад нэрээ дэвшүүлэх сонгогдох боломжоор хангагдах эрхээр хангагдсан. Энэ талаас бодвол УИХ-д байгаа намууд эвслүүд гишүүд бүгд зөвшилцөж байж даргаа сонгох учиртай. Зөвшилцөх бичгийг АН манай намд ажлыг цаг дууссаны буюу өнгөрөгч тав дахь өдөр ирүүлсэн. Бид нэг дахь өдөр нь ярьж шийдэхдээ нэр дэвшиж буй хүнтэй уулзаж санал бодлоо солилцох хүсэлтээ тавьсан. Гэтэл намын бүлгүүд байгуулагдаагүй учир уулзах боломжгүй гэдгээ мэдэгдсэн. Бид дахин МАН-аас нэр дэвшсэн гишүүдийн хүрээнд хуралдаад ирэх гурав дахь өдөр гэхэд эл асуудлаа шийднэ гэсэн зарчмын тохироонд хүрч энэ тухайгаа АН удирдлагад мэдэгдсэн. Түүнчлэн энэ асуудлаар УИХ-ын хамгийн ахмад настай гишүүн Д.Дэмбэрэлтэй өчигдөр Ерөнхийлөгч уулзаж маргааш 10.00 цагаас чуулганыг зарлаж явуулахаар тохирчээ. Гэтэл АН-ын гишүүд өнөөдөр хууль бусаар чуулганыг хуралдуулж даргаа сонголоо. Уг нь маргааш 10.00 цагт чуулган хуралдаж УИХ-ын даргын асуудлыг шийднэ гэсэн боловч хуралдаан өнөөдөр болж хэд хэдэн хууль зөрчигдлөө. Юуны өмнө УИХ-ын анхдугаар чуулганыг Ерөнхийлөгч нээж хамгийн ахмад настай гишүүн удирдана гэсэн маш тодорхой заалт бий. Хоёр дахь ахмад настай хүн гэсэн зохицуулалт байхгүй. Тиймээс өнөөдөр хуралдсан УИХ-ын чуулган хэд хэдэн хууль зөрчсөн тул Үндсэн хуулийн цэцэд хандана” гэл ээ.
Н.Түвшин