Өнөөдөр өглөө "Автобус-1" компанийн 11 чиглэлийн 106 автобусны 600 гаруй жолооч, кондукторууд ажил хаясан билээ. Компаний ажилчид удирдлагуудтай үл ойлголцох байдал үүссэн тул Нийслэлийн нийтийн тээврийн газар, Монголын тээвэр холбоо, Том оврын автобусны үйлчилгээ эрхлэгчдийн холбоо болон том оврын автобус компанийн ажилтны төлөөллүүд асуудлыг шийдвэрлэхээр хуралдаж зөвшилцөлд хүрчээ.
Энэ тухай Нийслэлийн нийтийн тээврийн газрын дарга Ч.Наранцэцэг "Тус компаний ажилчид нэг цагийн орлогын даалгавар /төлөвлөгөө/ өндөр байна, ажлын ачаалал ихтэй ч цалин нэмэгдэхгүй байна, хөдөлгөөний сахилга батын хариуцлага тооцохдоо давхардуулж арга хэмжээ авч байна, жолоочийн гэнэтийн ослын даатгалд хамрагддаг ч үр дүн муу байна гэсэн үндсэн дөрвөн шаардлагыг тавьж байна. Тэгээд энэ бүх асуудлыг шийдвэрлэхийн тулд "Автобус 1" компаний захирал Г.Төмөрбаатарыг ажлаас нь огцоруулахыг шаардаж байна гэлээ.
Ийм нөхцөл байдал үүссэн нь цэвэр тухайн компаний дотоод зохион байгуулалт, удирдлага, ажилчдын үл ойлголцлоос үүдэлтэй" гэлээ. Одоо тус компаний ажилчид цагийн хуваарийн дагуу нийтийн тээврийн үйлчилгээнд явж эхэлсэн байна.
Д.Цэцэг