Энэ сарын 5-8-нд Сэлэнгэ аймгийн Сүхбаатар хотод олныг сэртхийлгэсэн аймшигт хэрэг гарсан билээ. Тус аймгийн нэр бүхий долоон залуу 20 гаруй насны бүсгүйг гурван хоногийн турш“Солонго”, “Цэцэг”, “Орхон” зочид буудлуудад байлган зэрлэгээр зодож, танхайран бүлэглэн хүчинджээ. Хүчиндүүлсэн эмэгтэйг өчигдөр Нийслэл хотод авчирч, шаардлагатай бүх нарийн шинжилгээнд хамруулсан байна. Эдгээр залуус энэ сарын 8-нд бүсгүйг суллан явуулсан гэх. Хөөрхий бүсгүй зочид буудлаасаа шууд найз залуугийндаа очиж болсон явдлыг хэлснээр ар гэрийнхэн нь цагдаагийн байгууллагад хандсан бололтой байна. Хохирогч одоогоор шокноос гараагүй, сэтгэл санааны дарамтад оржээ. Улаанбаатар хотод хүргэгдэн ирсэн энэхүү бүсгүйд сэтгэл зүйн зөвлөгөө өгч эхэлсэн гэнэ.
Бүлэг хүчингийн хэрэг үйлдсэн залууст аймгийн цагдаагийн хэлтсээс эрүүгийн хэрэг үүсгэж, цагдан хорьсон байна. Тэдэнд Эрүүгийн хуулийн 126.3-д зааснаар эрүү үүсгэжээ. Уг зүйл ангид энэ хэргийг онц аюултай гэмт хэрэгтэн, зохион байгуулалттай бүлэг, гэмт бүлэглэл үйлдсэн, уг хэргийн улмаас хүний амь нас хохирсон, бусад хүнд хор уршиг учирсан, эсхүл бага насны, өөрөөр хэлбэл арван дөрвөн насанд хүрээгүй хүүхдийг хүчиндсэн бол арван таваас дээш хорин таван жил хүртэл хугацаагаар хорих, эсхүл цаазаар авах ял шийтгэнэ хэмээн заасан байдаг аж.Хэрэгт сэжиглэгдээд байгаа залуус 1987-1990 онд төрсөн, аймагтаа нөлөө бүхий алба хашдаг, бэлтэй айлын бийлэгжүү хүүхдүүд гэнэ.
Нэг тэрбум гаруй хүн амтай Энэтхэг улсад найз залуутайгаа явж байгаад зургаан залууд хүчиндүүлэн улмаар амь насаа алдсан хэрэг дэлхий нийтийг цочирдуулсан билээ. Гэтэл энэ хэрэг гарсны дараахан Монголд төстэй жигшүүр хэрэг гарав. Гурван зочид буудал дамнуулан хүчиндэж, зодож танхайрч байхад буудал ажиллуулж байгаа хүмүүс ашиг орлогоо бодоод нүдэн балай, чихэн дүлий өнгөрүүлснийг бодоход аймшигтай.
www.times.mn