-Тамирчдад зарцуулах ёстой мөнгийг компани руу шилжүүлж, хувьдаа завшсан гэх хэргээр шалгаж буй гэнэ-
Монголын үндэсний олимпийн хорооны ерөнхийлөгч Д.Загдсүрэнд Авилгатай тэмцэх газраас эрүүгийн хэрэг үүсгэн шалгаж эхэлсэн тухай өнөөдрийн "Өдрийн сонин"-д тэргүүн нүүрэндээ нийтэлжээ. Түүнийг Монголын тамирчдад зарцуулах ёстой мөнгөний тодорхой хувийг хувийн компани руу шилжүүлж түүнийгээ хувьдаа завшдаг гэх үндэслэлээр ийнхүү шалгаж байгаа гэнэ. Тэр мөнгө нь Олон улсын олимпийн хорооноос төдийгүй Монгол Улсын Засгийн газраас тус хороонд ирдэг мөнгө аж. Монголын тамирчдын бэлтгэл сургуулиалт, дэлхийн хэмжээний уралдаан тэмцээнд зарцуулах учиртай. Гэтэл энэ санхүүжилтийн тодорой хувь нь тамирчдад биш МҮОХ-ны зарим удирдлагуудын "халаасанд" ордог гэнэ. Иймд Д.Загдсүрэнд төрийн бус байгууллагын албан тушаалтан албан тушаалаа ашигласан, мөнгө завшсан гэж үзэж Эрүүгийн хуулийн 265,150 дугаар зүйл ангиудаар буруутгаж байгаа аж. Тэрбээр МҮОХ-ны ерөнхийлөгчийн сонгуульт албыг хаших явцдаа тус холбооны өмчлөлийн газар буюу хашаан доторх хэсэг газрыг хувийн компанид дур мэдэн өгсөн тухай эх сурвалжид дурджээ. Эх сурвалж: Өдрийн сонин