Монголын Ногоон Нам, Эрх чөлөөг хэрэгжүүлэгч нам, Эх орончдын нэгдсэн намын дарга нар өнөөдөр 2013 оны Ерөнхийлөгчийн сонгуульд МАН-аас нэр дэвшигч Б.Бат-Эрдэнийг дэмжиж, хамтран ажиллах санамж бичигт гарын үсэг зурлаа. Тусгаар тогтнолын ордонд болсон энэхүү гарын үсэг зурах ёслолд МАН-ын генсек Г.Занданшатар намаа төлөөлж, Монголын Ногоон намын дарга О.Бум-Ялагч, Эрх чөлөөг хэрэгжүүлэгч намын дарга Ш.Төмөрсүх, Эх орончдын нэгдсэн намын дарга Г.Ганбат нар оролцов. Энэхүү санамж бичгийг байгуулсанаар дээрх намууд МАН-аас нэр дэвшигч Б.Бат-Эрдэнийн Ерөнхийлөгчийн сонгуулийн мөрийн хөтөлбөрийг дэмжин, сонгуулийн сурталчилгаанд хамтран оролцох аж. МАН “Эв санааны тунхаг бичиг” гарган тусгаар тогтнол, түүхэн уламжлал, үнэт зүйлсдээ үнэнч байж, эв нэгдлээ эрхэмлэн, үндэсний аюулгүй байдал, эрх чөлөөг баталгаажуулах, эх орныхоо хөгжил, Монгол Улсын үндэсний язгуур эрх ашгийг бүхнээс дээдэлж, ард түмнийхээ эрх, эрх чөлөөг баталгаажуулж, хүн ардынхаа сайн сайхны төлөө нэгэн хүчээр тууштай ажиллахаа амлахын сацуу энэхүү үзэл санаанд нэгдэх бүх намтай хамтран ажиллана гэдгээ илэрхийллээ.
МАН-ын генсек Г.Занданшатар энэ үеэр “Монголын Ногоон нам, Эрх чөлөөг хэрэгжүүлэгч нам, Эх орончдын нэгдсэн намуудтай сонгуулийн үеэр хамтран ажиллахаар боллоо. Зөвхөн сонгуулиар хязгаарлахгүй цаашид улс орон, ардчилал, тусгаар тогтнол, хүний эрх чөлөө, байгаль орчны төлөө хамтран ажиллана. Яагаад гэвэл Ардчилсан засаг эрх барьсан цагаас эхлэн хаана, хязгаарлана, цуцлана гэдэг нийгэм руу явж байна. Бид хийнэ, бүтээнэ, эвлүүлнэ гэдэг нийгмийг эргүүлэн авчирч, энэ бүх хүний эрхийн зөрчлийг арилгана. Улс байгальд ээлтэй ногоон бодлого баримталж, газар шороо ус нутгаа хамгаална. Манай намаас нэр дэвшиж байгаа Б.Бат-Эрдэнэ бол ёс жудагтай, Монгол Улсын дархан аварга, төрд гурван удаа сонгогдсон төрийн түшээ хүн” гэв.
П.Наран