Цус сэлбэлт судлалын үндэсний төвийн шинэ барилгын шавыг тавих ёслол боллоо. Цус сэлбэлт судлалын үндэсний төвийн барилга муудаж үйл ажиллагаагаа явуулахад  хүндрэлтэй болсон учир шинэ төвтэй болох шийдвэр гараад байсан юм.  Шинэ барилгыг  нэгдсэн хоёрдугаар эмнэлгийн хашаанд барихаар болсон.

Өнөөдөр тус барилгын шавь тавих ёслол боллоо. Шав тавих ёслолд эрүүл мэндийн дэд сайд Ж.Амарсанаа оролцсон юм. Тэрбээр “Дэлхий даяар байгалийн тэнцвэрт байдал алдагдаж гамшгийн давтамж ихсэж, хүн амын осол бэртэл нэмэгдэж байгаа энэ цаг үед цус цусан бүтээгдэхүүний нөөцийг бүрдүүлэх, найдвартай хадгалж, аюулгүй байдалд анхаарал хандуулах хэрэгтэй байна. Цус сэлбэлт судлалын үндэсний төвийн сүүлийн 10 жилийн тайлангаас харахад цусаа бэлэглэсэн донорын тоо 2000 онд 10845 байсан бол 2012 онд 20854 болж, цус цусан бүтээгдэхүүний үйлдвэрлэл 2000 онд 4825 байсан бол 2012 онд 9378 болж 2 дахин өссөн үзүүлэлттэй байна. Сүүлийн 5 жилд хүн амын эрүүл мэндийн үзүүлэлтээс харахад өвчлөл, нас баралтын шалтгаанд хорт хавдар, осол гэмтэл орж байгаа нь цус цусан бүтээгдэхүүний хэрэгцээг эрс нэмэгдүүлэхэд хүргэж байгаа юм.  Иймээс үндэсний аюулгүй байдлын салшгүй нэг хэсэг болох цус цусан бүтээгдэхүүний аюулгүй байдлыг хангах талаар Монгол Улсын Засгийн газар, Эрүүл мэндийн яам онцгой анхаарал хандуулан ажиллаж байгаагийн нэг нь шинээр баригдах гэж буй Цус сэлбэлт судлалын үндэсний төв билээ” хэмээн хэлжээ.

Сонирхуулахад, уг төвийг Азийн хөгжлийн банкны “Эрүүл мэндийн салбарын хөгжил хөтөлбөр-5” төслийн хүрээнд барих бөгөөд барилгын ажилд нийт 12,8 сая ам.доллор зарцуулахаар болжээ.