.

Геннадий Гатилов “Болж байгаа явдалд дүн шинжилгээ хийхэд Иракийн схемтэй адилхан байна” гэжээ. Энэ нь үй олноор хөнөөх зэвсэг хэрэглэсэнд буруутгаж НҮБ-д төсөл оруулан дараагийн зайлшгүй арга хэмжээг авахуулахыг яаравчлах юм хэмээн тэрбээр тайлбарласан байна.

.

НҮБ-д суугаа Аюулгүйн зөвлөлийн хаалттай хуралдаан дээр тус байгууллагад суугаа АНУ-ын байнгын төлөөлөгч Саманта Пауэр наймдугаар сарын 28-нд Сирид яаралтай арга хэмжээ авахыг уриалсан юм. Хуралдаанд ОХУ, Их Британи, Хятад, АНУ, Францын төлөөлөгч оролцжээ.

Өмнө нь Их Британийн Гадаад хэргийн сайд Уильям Хейг "Барууны орнууд урьдчилсан байдлаар НҮБ-ын АЗ-өөс хориг гарсан ч цохилт өгнө" хэмээн мэдэгдээд байв.

.

НҮБ-ын Ерөнхий нарийн бичгийн дарга Бан Ги Мун Сирийн хямралыг цэргийн хүчээр биш, дипломат арга замаар шийдвэрлэх боломж олгохыг уриаллаа. Сирид ажиллаж буй НҮБ-ын шинжээчдийн багийн дүгнэлт Аюулгүйн зөвлөлөөр Сирийн асуудлыг шийдвэрлэх албан ёсны үндэслэл болох юм. Шинжээчдийн баг өнгөрөгч даваа гарагт химийн зэвсэг хэрэглэж олон хүний амийг хөнөөсөн гэж сэжиглэж буй газарт үзлэг хийсэн ч мягмар гарагт түр зогсоосон байна. Учир нь НҮБ-ын шинжээчдийн багийн цуваа руу буудаж халдлага болсон юм. Энэ талаар НҮБ-ын Ерөнхий нарийн бичгийн дарга Бан Ги Мун “Химийн зэвсэг хэрэглэсэн эсэхийг тогтоох мөрдөн шалгах ажиллагаа дуусах хүртэл асуудалд тун нухацтай хандах ёстой. Манай шинжээчид аюултай нөхцөл байдалд ажиллаж байна. Мөрдлөгийн ажил дөрөв хоногийн хугацаанд үргэлжилнэ. Мөрдлөгийн үр дүнг НҮБ-ын Аюулгүйн зөвлөлд танилцуулах болно” гэсэн юм.

.

Оросын хэвлэлээр зарим эх сурвалж америкчууд тэдний холбоотнууд Сирид пүрэв гаригт цохилт өгөхөөр бэлтгэсэн хэмээн мэдээлж байна.

Д.Од