Индонези Улсын Балид 11 дүгээр сарын 22-29-ний өдрүүдэд хуралдаж буй ЮНЕСКО-гийн Биет бус соёлын өвийг хамгаалах Конвенцийн Засгийн газар хоорондын 6 дугаар чуулганд Монгол Улсыг төлөөлж ЮНЕСКО-гийн Монголын Үндэсний комиссын Ерөнхий нарийн бичгийн дарга Г.Жаргалсайхан тэргүүтэй төлөөлөгчид оролцож байна. Чуулганы 11 дүгээр сарын 24-ний өдрийн хуралдаанаар Монгол Улсаас дэвшүүлсэн “Монгол лимбэчдийн уртын дуу хөгжимдөх уламжлалт арга барил – битүү амьсгаа”-г ЮНЕСКО-гийн Яаралтай хамгаалах шаардлагатай биет бус өвийн жагсаалтад бүртгэн авах шийдвэрийг гишүүд гаргасан байна. Ийнхүү ЮНЕСКО-гийн Хүн төрөлхтний биет бус соёлын өвийн Төлөөллийн болон Яаралтай хамгаалах шаардлагатай соёлын биет бус өвийн Жагсаалтад Монгол Улсын нийт 9 биет бус өв бүртгэлтэй боллоо. Энэ удаагийн хуралдаанаар нийт 73 биет бус өвийн номинацын материал хэлэлцэх ажээ. Одоогийн байдлаар ЮНЕСКО-гийн “Яаралтай хамгаалах шаардлагатай биет бус өвийн жагсаалтад 13 улсын 25 биет бус өв, ЮНЕСКО-гийн Хүн төрөлхтний биет бус соёлын өвийн төлөөллийн жагсаалтад 68 улсын 213 биет бус өв тус тус бүртгэлтэй юм байна.