Өнөөдөр 11.00 цагийн орчимд Баянзүрх дүүргийн 18-р хорооны “Эрдмийн түлхүүр” хувийн цэцэрлэгт багш нь ангийнхаа хүүхдийн ээжийг зодлоо гэх мэдээлэл цахим хуудаснаа байрлажээ. Уг мэдээллийн дагуу  цэцэрлэгийн багшид зодуулсан гэх ээж Э.Энх-Төгстэй холбогдож, болсон явдлыг ярилцлаа.

6

-Сайн байна уу. Шууд.мн сайтаас ярьж байна. Хүүгийн тань цэцэрлэгийн багш таныг зодсон гэх мэдээлэл цацагдаж байна. Чухам юу болсон юм бэ?

-Ойрд хүү маань цэцэрлэгтээ явах их дургүй болсон. Хүү маань “Ээжээ би тэр цэцэрлэгт чинь явмааргүй байна. Манай багш аймар” гээд л цэцэрлэгтээ явах гэж бөөн юм болдог болсон. Эхэндээ би хүүгээ цэцэрлэгтээ явахгүй гэсэндээ худлаа ярьж байна гээд тоодоггүй байсан. Гэтэл өчигдөр орой цэцэрлэгээс нь авсан чинь “Багш муухай. Би багшаас айдаг. Намайг бай бай гэдэг гээд” бие рүүгээ заасан. Тэгэхээр нь хүүтэйгээ ярилцсан. “Яагаад чамайг зоддог юм бэ, миний хүү үймүүлээд багшийнхаа үгэнд ордоггүй юм уу” гэсэн чинь “Ордог. Ганцхан намайг зоддоггүй. Маамуу нарыг ч бас зоддог” гээд ярьсан. Тэгэхээр нь харанхуй шөнө хэрүүл хийгээд дэмий байх гэж бодсон. Тэгээд өнөө өглөө хүүгээ хүргэж өгөөд багштай нь ярилцая гэж бодоод цэцэрлэг дээр нь ирсэн. Багшаас нь хүүхэд зодсон эсэхийг нь асуутал, намайг элдвээр доромжилж эхэлсэн. Би ч мөчөөгөө өгөөгүй. Гэтэл намайг үсдэж дарж унагаад зодсон.

Би үнэхээр гомдолтой байна. Цэцэрлэгийн хүүхдийнхээ ээжийг зодож байгаа хүн хүний нялх хүүхдүүдийг зодохгүй байна гэх үндэслэл байхгүй.

6

-Таныг зодсон гэх багшийн нэр хэн бэ. Зодоон болох үед цэцэрлэгийн удирдлагуудаас байсан уу?

-Тэрийг сайн мэдээгүй. Би зодуулчихаад гараад 102 дуудсан. Намайг зодсон миний хүүгийн багшийг н.Санчир гэдэг. 20 гаруй насны охин байгаа.

6

-Танай хүүхэд хэзээнээс энэ цэцэрлэгт явж эхэлсэн юм бэ?

-Сар гаруй л энэ цэцэрлэгт явж байна. Хүү маань өмнө нь “Амила”-д явж байсан. Энэ багшдаа зодуулдаг байсан болохоороо “Ээжээ би Амила руугаа явая тэгэх үү” гэж гуйдаг байсан байх. “Амила” цэцэрлэгийн төлбөр сард 350 мянга байдаг, харин энэ цэцэрлэгийн төлбөр 200 мянга. Хэн хүнд мөнгө хэрэгтэй, бас гэрт ойрхон учраас энэ цэцэрлэгт сарын өмнөөс хүүгээ өгсөн юм. Энэ “Эрдмийн түлхүүр” цэцэрлэг байгуулагдаад удаагүй.

5

-Таны хүү өмнө нь цэцэрлэгээс ирэхдээ биедээ ямар нэг гэмтэл, хөхрөл авсан байсныг анзаарч байв уу?

-Анзаарч байгаагүй. Би хүүхдээ тийм зэрлэг багштай цэцэрлэгт явуулж байгаагаа мэдээгүй. Эцэг эхчүүддээ анхааруулахад хүүхдийнхээ багш нарыг анзаарч байгаарай гэж хэлмээр байна” хэмээн ярьсан юм.

 Ямартаа ч, хувийн цэцэрлэг сургуулийг хариуцаж ажилдаг Нийслэлийн боловсролын газар цэцэрлэг, түүний боловсон хүчнүүдэд  анхаарлаа хандуулах цаг нь болжээ.

5

Б.Одон