Энэ оны дэлхийн шилдэг хөлбөмбөгчин буюу Ballon d’Or-ын эзнийг тодруулах эцсийн шатны шалгаруулалт явагдаж Лионел Месси, Криштиан Рональду, Шави Эрнандес нарын нэрийг зарлалаа. Нийтдээ 23 хөлбөмбөгчийн нэрийг дэвшүүлснээс ийнхүү сүүлчийн шатны гурван өрсөлдөгчийг нэрлэж байна. Аргентины шигшээ болон Испанийн “Барселона” клубын довтлогч Лионел Месси, Португалийн шигшээ болон Испанийн “Реал Мадрид”-ын хагас хамгаалагч Криштиан Рональду, Испанийн шигшээ болон “Барселона”-гийн хагас хамгаалагч Шави Эрнандес нарын хэн нэг нь ирэх сарын 9-нд Швейцарийн Цюрих хотноо Ballon d’Or-ын эзнээр тодорно. Криштиан Рональду 2008 онд энэхүү нэр хүндтэй шагналын эзэн болж дэлхийн шилдэг хөлбөмбөгчнөөр нэрлэгдсэн бол Лионел Месси 2009, 2010 он дараалан энэ алдрыг хүртэж байгаа юм. Месси, Шави нар хамтдаа Барсагийн бүрэлдэхүүнд хүчин зүтгэх болсноор Испанийн аварга, Испанийн Супер цомын аварга, Аваргуудын лигийн аваргаар тодроод байгаа бол Криштиан Рональду Испанийн цомын аварга болж, “Алтан пүүз” шагналын эзнээр тодорсон. Английн шигшээ болон Манчестер Юнайтед  клубын довтлогч Уэйн Рүүни сүүлчийн шатанд тунаж үлдээгүй ч оны шилдэг гоолын эзэн хэмээх бас нэгэн нэр хүндтэй шагналд өрсөлдөхөөр болжээ. Түүнтэй Лионел Месси болон Сантос клубын довтлогч Неймар нар ганган гоолоороо өрсөлдөнө. Спортын хорхойтнууд болон мэргэжилтнүүдийн таамаглаж байгаагаар Лионел Месси гурав дахь жилдээ дараалан Ballon d’Or-ын эзнээр тодорвол домогт Зинедин Зидан болон Бразилийн Рональдо нарын гурван удаа дэлхийн шилдгээр шалгарч байсан амжилттай эн зэрэгцэх юм. Криштиан Рональду энэ шагналыг хүртвэл хоёр дахь удаагаа Ballon d’Or-ын эзэн болж энэ цаг үеийн гол өрсөлдөгч Лионел Месситэй эн зэрэгцэх юм. Мөн Бразилийн Рональдино энэ шагналыг хоёр удаа хүртэж байлаа. Шавигийн хувьд өрсөлдөөнд ялж гарвал анх удаагаа энэхүү эрхэм алдрын эзэн болж алдарт Лотар Маттеус, Марко ван Бастен, Ривальдо, Ромарио, Луиш Фигу, Роберто Бажо нарын эгнээнд нэгдэх юм.