МАХН-ын дарга Н.Энхбаярын туслах Б.Тулгыг “Өргөө” зочид буудал, Улаанбаатар хэвлэх үйлдвэрийн хувьчлалын хэрэгт холбогдуулан шалгаж буйг эсэргүүцсэн иргэд нийслэлийн Прокурорын газрын гаднах талбайд өчигдөр жагсаал зохион байгуулсан байна. Тэрхүү жагсаал хууль бус бөгөөд хэргийг шалгах ажиллагаанд саад учруулж байна гэсэн мэдээллийг тус газрын орлогч дарга Ё.Сагсай хэвлэлийн хурлын үеэр сэтгүүлчдэд өгчээ. Түүнээс зарим зүйлийг тодрууллаа.
-Жагсагчид хяналтын прокурор О.Мөнхбаатарын биед халдсан гэж үнэн үү?
- Б.Тулгыг шалгаж буйг эсэргүүцсэн иргэд уг хэрэгт хяналт тавьж буй прокурор О.Мөнхбаатарын биед нь хүрч эрхэнд нь халдсан. Б.Тулгад хуулийн хүрээнд цагдан хорих таслан сэргийлэх арга хэмжээ авсан. Гэтэл иргэдийн зүгээс хууль бус шаардлага тавьж, мөрдөн байцаалтын ажиллагаанд саад учруулж байна. Тиймээс энэхүү үйлдлээ нэн даруй зогсоохыг жагсагчдаас хүсье.
-Б.Тулгын хэргийг шалгах явц ямар шатандаа яваа вэ?
- Мөрдөн байцаалтын шатанд шалгаж буй эрүүгийн хэргийн талаар мэдээлэл өгөх боломжгүй. Мөрдөн байцаах ажиллагааны нууц гэж бий. Хэрэв задруулбал эрүүгийн хариуцлага хүлээнэ. Б.Тулгад холбоотой хэргийн мөрдөн шалгах ажиллагаа дуусаагүй учир энэ талаар мэдээлэх боломжгүй. Түүнчлэн эрүүгийн байцаан шийтгэх хуулинд сэжигтэн яллагдагчид таслан сэргийлэх арга хэмжээг төрлөөр нь тодорхой заасан. Үүний нэг төрөл нь цагдан хорих таслан сэргийлэх арга хэмжээ. Сэжигтнийг цагдан хорих үндэслэл нь Эрүүгийн байцаан шийтгэх хуулинд бий. Энэ үндэслэлээр Б.Тулгын цагдан хорих таслан сэргийлэх арга хэмжээг үргэлжлүүлэн авах ёстой гэж үзэн манай прокурорын газраас Сүхбаатар дүүргийн шүүхэд хүсэлтээ хүргүүлсэн. Б.Тулгыг үргэлжлүүэн хорих шаардлагатай гэж үзэж байна.
Н.Түвшин