Урд хөрш рүү найзыгаа хил дамнуулан худалдсан хэрэгт яллагдагчаар татагдсан Д.Сэлэнгэд холбогдох хэргийн шүүх хурал өчигдөр Сүхбаатар дүүргийн шүүхэд товлогдсон. Гэвч уг хэрэгт хяналт тавьсан прокурор хуралд оролцох боломжгүй болсон тул хэргийг хэлэлцэх хугацааг энэ сарын 19-ны өдөр хүртэл хойшлуулах шийдвэрийг шүүгч гаргалаа.  Энэ үер яллагдагч Д.Сэлэнгээс цөөн асуултад хариулт авсан юм. -Өөрт тань ямар зүйл ангиар хэрэг үүсгэсэн бэ. Мөрдөн байцаалтын явцад хэргээ хүлээсэн үү? - Эрүүгийн хуулийн тусгай ангийн 124.2-т зааснаар буюу биеэ үнэлэх газар байгуулсан, санхүүжүүлсэн, түүнчлэн биеэ үнэлэхэд зуучилсан, биеэ үнэлэхийг байнга зохион байгуулсан, тээврийн хэрэгсэл, орон байр, бусад зүйлээр үйлчилсэн гэх үндэслэлээр буруутгаж байгаа.  Би ийм хэрэг хийгээгүй. Гэм бурууг шүүх тогтооно. - Хохирогчийг өмнө нь таньдаг байсан уу? - Уг нь миний найз Гантуяа гэдэг эмэгтэй бий. Тэр Замын-Үүд боомтоос  цагдаа нарт баривчлагдаж ирэхдээ намайг өөрийг нь хятад руу  дагуулж явсан гэж мэдүүлсэн юм билээ. -Та хоёр хамт биеэ үнэлж байсан хэрэг үү? -Шүүхийн шийдвэр гараагүй байхад ямар нэгэн мэдээлэл өгөхгүй.