Баян-Өлгий аймгийн Нийгмийн халамж үйлчилгээний газар болон зарим банкны ажилчид нас барсан иргэний бичиг баримтыг хуурамчаар үйлдэн тэтгэвэр, халамж авч байсан. Шан харамж авч эх орны хувь, хишиг зэрэг халамж үйлчилгээний мөнгийг нь хууль ёсны баримтгүйгээр эзэнд нь бус өөр хүнд олгодог байсан хэрэг гарсан. Энэхүү хэрэгт Эрүүгийн хуулийн 150.3-т заасны дагуу “бусдын эд хөрөнгийг завших, үрэгдүүлснээс онц их хэмжээний хохирол учруулсан” гэж зүйлчлэн эрүүгийн хэрэг үүсгэн Мөрдөн байцаах газрын Зохион байгуулалттай гэмт хэрэг мөрдөх хэлтэст мөрдөн байцаалтын ажиллагаа явуулж байгаа аж.
Албаны эх сурвалжийн мэдээлснээр одоогийн байдлаар давхардсан тоогоор 2.8 сая иргэний халамж, санхүүжилтын орлогыг нийгмийн халамж үйлчилгээний мэдээллийн сан, овог нэр, регистрийн дугаартай нь тулган шалгалт хийж байгаа аж. Эндээс хэдэн нас барсан хүний халамжийг авсан, хэдэн бичилт хийсэн, хэдэн төгрөгийн хохирол учирсан гэдэг нь тодорхой болох юм байна.
Уг аймагт энэ байдал нь хэдэн оноос эхэлсэн нь тодорхойгүй, даамжирсан үйлдэл ба хүүхэд эндээд 2-3 жил болж байхад тэмдэглэгдээгүй хүүхдийн мөнгө зэргийг аваад явж байсан тохиолдол бий гэнэ.
Б.Буд