Амстердамаас Куала Лампурыг чиглэн явсан Малайзын зорчигч тээврийн “МН17” онгоц Украины Грабово хотын хил орчимд осолдсон билээ. Эхний мэдээгээр онгоцны ослоор 280 зорчигч болон багийн 15 гишүүн осолдож амиа алдсан гэв. Харин Малайзын тээврийн яамнаас мэдээлсэнээр бүртгэлгүй гурван иргэн байсныг хэвлэлийнхэнд мэдэгдлээ. Тэд алан хядагч эсэх нь одоогоор тодорхойгүй байгаа гэнэ. Тэдний нэр болон аль улсын иргэн гэдгийг тодруулахаар ажиллаж байгаа аж. Ослоор амиа алдсан зорчигчдын хамгийн бага нь зургаан сартай бол хамгийн ахмад 97 настай байжээ.Онгоцонд Голландын 189, Австралийн 27, Малайзын 44, Индонезын 12, Их Британийн 4, Германы 4, Бельгийн 4, Филиппин 3, Канадын ,1 Шинэ Зеландын 1, АНУ-ын 1 болон багийн 15 гишүүн байсан юм. Ослын дараа Голланд болон Малайз улсад гурван өдрийн гашуудал зарласан гэж “ВВС” уламжлав.
ө
Нэг гэр бүлийн дөрвөн гишүүн амиа алджээ
Онгоцны ослоор нэг бүлийн дөрвөн гишүүн амиа алдсан тухай “www.dailymail.co.uk” мэдээллээ. Голланд улсын иргэн Жон Паулсен эхнэр болон 3, 5 настай хоёр хүүгийнхээ хамтаар Куала Лампурт амьдардаг хадам ээжийндээ зочлохоор явж байжээ.
ө
Хоёр нислэгт гэр бүлийнхээ хоёр гишүүнийг алдав
Гурван сарын өмнө сураггүй болсон Малайзын “МН370” онгоцонд төрсөн ахаа алдсан эмэгтэй “МН17” онгоцны ослоор өргөмөл 19 настай охиноо алдсан харамсалтай явдал тохиолджээ. Голланд улсын иргэн Кэйлин Манн гэх эмэгтэй ийнхүү Малайзын хоёр ч нислэгт гэр бүлийнхээ хоёр гишүүнээ алджээ.
ө
Зорчигчдын гуравны нэг нь чуулга уулзалтад оролцох байжээ
Австралийн “Sydney Morning Herald” сонинд бичсэнээр сүйрсэн “МН17” онгоцны зорчигчдын гуравны нэг буюу 105 зорчигч Австралийн Мелбурн хотод болох Олон Улсын “ДОХ” судлалын XX чуулганд оролцохоор зорчиж явсан тухай НҮБ-ын хэвлэлийн албанаас мэдээлэв.
ө
Малайзын гоо бүсгүй онгоцны ослоор амиа алдав
2009 оны Малайзын гоо бүсгүй Шазан Шаллах “МН17” онгоцонд зорчиж явжээ. Тэрээр Австрали улсад амрахаар явж байсан хэмээн охины ээж хэвлэлийнхэнд ярьсан байна.
ө
Ах дүү гурав амиа алджээ
Куала Лампурт ажилладаг аав дээрээ очихоор “МН17” онгоцонд зорчиж явсан ах дүү гурав амиа алджээ. Мао Маслон 12, Евай Маслон 10, Ник Маслон 8 настай байжээ. Хэдхэн сарын өмнө хүүхдүүдийн ээж хорт хавдраар хорвоог орхисон байна.
ө
Нөхөр нь “МН370”, эхнэр нь “МН17”-ийн ослоор амиа алдав
Австралийн нэгэн гэр бүлд эмгэнэлтэй хувь тавилан тохиожээ. Сураггүй болсон “МН370” онгоцны 239 зорчигчийн нэг Каулене Манны эхнэр Рузз Манн хоёр хоногийн өмнө Украинд осолдсон “МН17” онгоцонд зорчиж явж байжээ. Рузз Манн “МН370” онгоцны асуудлаар Малайзын удирдлагудтай уулзахаар төлөвлөж байсан гэнэ.
а
Б.Дэлгэрцэцэг