Өнгөрсөн гуравдугаар сараас Европын холбоо Оросын Засаг захиргааг Украины салан тусгаарлагчдыг дэмжсэн, Крымийн хойгийг булаан эзэлсэн хэмээн буруутгаж хэд хэдэн салбарт хориг арга хэмжээ авсан юм. Тэгвэл Европын холбооноос Орост суугаа элчин сайд Вигаудас Ушацкас “Интерфакс” агентлагт ярилцлага өгөхдөө “Украины зүүн хязгаарт байдал тогтворжвол Оросын эсрэг аваад буй эдийн засаг, санхүүгийн болон улс төрийн хориг арга хэмжээг цуцалж магадгүй. Энэ асуудлаар АНУ тэргүүтэй хэд хэдэн орон шуурхай хуралдсан. Эцсийн шийдвэр тун удахгүй гарна” гэж ярьсан байна.

1

Европын холбоо Орост газрын тос, шатдаг хийн олборлолт, төмөр зам, батлан хамгаалах салбар, банк санхүү, иргэний агаарын тээвэр гэх мэт салбарт хамтран ажиллахыг гишүүн орнууддаа хориглосон билээ. Харин хориг үйлчлээд хэдэн сарын дараа ОХУ-ын Ерөнхийлөгч В.Путин зарлиг гаргаж, Европын холбооны орнуудаас бүх төрлийн мах, жимс, хүнсний ногоо, сүү ба сүүн бүтээгдэхүүн импортлон оруулахыг нэг жилийн хугацаанд хориглосон юм. Тус шийдвэрийн улмаас Норвеги, Польш, Канад, Австрали зэрэг орнуудын хөдөө аж ахуйн салбар уналтад орж, Европын холбооноос Орост аваад буй хоригоо цуцлахыг шаардаж буй. Энэ амралтын өдөр Австралийн Гадаад хэргийн сайд Боб Карр Европын холбооны тэргүүн Хосе Мануэл Барросотой энэ асуудлаар ярилцсан гэж Вигаудас Ушацкас ярилцлагынхаа төгсгөлд дурьджээ.

1

Б.Дэлгэрцэцэг