"Ноос ноолуур, арьс ширэн бүтээгдэхүүн-2014" үзэсгэлэн Мишээл экспод нээгдлээ. Уг үзэсгэлэн Үйлдвэр хөдөө аж ахуйн яам”, нийслэлийн Засаг даргын Тамгын газар Монголын ажил олгогч эздийн холбооны дэмжлэгтэйгээр зохион байгуулагдаж буй юм. Нээлтийн үеэр ҮХАА-н дэд сайд Б.Цогтгэрэл “Монголын ноос, ноолуур, арьс шир боловсруулах салбарынхан жилийн ажлаа дүгнэх, хэрэглэгчдэд бүтээгдэхүүнээ танилцуулах зорилгоор наймдах дахь жилдээ зохион байгуулж байна. Энэ жилийн хувьд Монгол улсад Хөнгөн аж үйлдвэрийн салбар үүсч хөгжсний 80 жилийн ойн тохиож  амжилт ололт арвин болж байгаагаараа онцлог юм. Монгол улсын эдийн засгийн өсөлтөнд уул уурхайн салбар голлох үүргийг  үзүүлж байгаа хэдий ч түүхий эдийн  нөөц, байгаль орчны асуудал  зэрэг нь  нийгмийн бас нэгэн тулгамдсан асуудал болоод байгаа. Харин түүхий эд нь  эргэн нөхөгдөх боломжтой малын гаралтай түүхий эдийг боловсруулах, нэмүү өртөг шингэсэн ноос ноолуур, арьс ширэн  бүтээгдэхүүний үйлдвэрлэлийг дэмжих  нийгмийн  шаардлага  бий болж  байна. Ундардаг салбараа төр засаг нь дэмжих цаг ирсэн” гэдгийг онцолж байв.

а

Энэхүү арга хэмжээнд ноос ноолуур, арьс ширэн бүтээгдэхүүн үйлдвэрлэгч 100 гаруй хувь хүн аж ахуй нэгж оролцож, үзэсгэлэнгийн өдрүүдэд:

• Импортыг орлох бараа бүтээгдэхүүнийг нэмэгдүүлэх
• Арьс шир, ноос ноолууран бүтээгдэхүүн үйлдвэрлэгчдийг бараа бүтээгдэхүүнээ танилцуулах
• Брэнд бүтээгдэхүүнийг бии болгох боломжийг бүрдүүлэх
• Шилдэг бүтээгдэхүүн, үйлдвэрлэгч, оролцогчийг шалгаруулж, урамшуулах, нийтэд сурталчлах
• Маркетинг борлуулалтын ажилд нь бодит хувь нэмэр оруулах
• Бараа бүтээгдэхүүн шинэ загвар, шинэ дизайн, чанар эдэлгээг олон нийтэд сурталчлан таниулах
• Төр, хувийн хэвшлийн байгууллагуудын хамтын ажиллагааг өргөжүүлэх харилцан туршлага солилцох нөхцөл бололцоог бүрдүүлж өгөх
• 2014 оны ноос ноолуур, арьсан хувцасны загварын чиг хандлагыг тодорхойлсон загварын үзүүлбэр үзүүлэх
• Бүх бараа бүтээгдэхүүн үйлдвэрийн үнээр болон 10-40 хувийн хямдралтай худалдаа, гэр бүлийн багцын хямдрал, хямдралын ваучер олгох юм байна.

ө

Төрөөс ноосны үйлдвэрүүдэд 70 тэрбум, ноолуурын үндэсний үйлдвэрүүдэд  107 тэрбум, арьс ширний үйлдвэрүүдэд 140 тэрбум  төгрөгийн хөнгөлөлттэй зээлийг 5 жилийн хугацаатай олгож эхэлсэн билээ. Мөн үндэсний үйлдвэрт хонины болон тэмээний ноосоо тушаасан малчдад урамшуулал олгохоор 12.3 тэрбум, арьс ширээ тушаасан малчдад 2.7 тэрбум төгрөгийг олгоод буй юм.

б

В.Бат