Хан-Уул дүүргийн нэгдүгээр хорооны нутаг дэвсгэрт зөвшөөрөлгүй баригдсан 12 давхар “G.M.V” зочид буудлын барилгыг энэ сарын 12-ноос нурааж эхэлжээ.
Учир нь “Адоре пропертиз” ХХК-ийн нэр дээр барьсан тус барилгыг анх 2002 онд Нийслэлийн Засаг дарга байсан одоогийн УИХ-ын гишүүн М.Энхболд зочид буудлын зориулалтаар 490 метр2 газрын зөвшөөрлийг олгож байжээ. 2004 онд уг газрын хэмжээг нэмэгдүүлж нийтдээ 1320 метр квадрат талбайтай газрын зөвшөөрлийг бусдад шилжүүлэн худалдсан байсан гэнэ.
2009 онд тухайн үед хотын мээрээр ажиллаж байсан Г.Мөнхбаяр энэхүү зөвшөөрлийг хүчингүй болгож, нураах шийдвэрийг Хан-Уул дүүргийн Засаг даргад үүрэг болгожээ. Гэвч Хан-Уул дүүргийн Засаг дарга 2011 онд уг барилгыг нураах шийдвэр гаргаж байсан ч өдийг хүртэл нураагаагүй байсан юм. Харин хотын захирагч Э.Бат-Үүл 2012 онд уг барилгыг нураана гэж мэдэгдэж байсан билээ.
Иймд уг өргөтгөлийг нураах ажлыг “Тод Бум” констракшн Нийслэлийн өмчийн харилцааны газартай гэрээ байгуулан гүйцэтгэж байгаа аж.
Уг барилгын гүйцэтгэл 80 хувьтай байсныг эх сурвалж онцоллоо.
Б.Дэжид